وەزارەتا ناڤخۆیا ئیراقێ: 71 بارەگەهێن وەهمی یێن سەر ب حەشدا شەعبی ڤە هاتینە دائێخستن
وەزارەتا ناڤخۆیا ئیراقێ راگەهاند كو تا نهۆ زێدەتر ژ نیڤ ملیۆن پارچە چەك هاتینە تۆماركرن و كار بۆ دروستكرنا بانكا پێزانینان بۆ شەش ملیۆن پارچە چەكان دهێتە كرن دیسان 71 بارەگەهێن وەهمی یێن سەر ب حەشدا شەعبی ڤە هاتینە دائێخستن.
میقداد میری، پەیڤدارێ وەزارەتا ناڤخۆیا ئیراقێ د كۆنگرەیەكێ رۆژنامەڤانی دا راگەهاند كو پرۆسەیا تۆماركرنا چەكی ب سەركەفتییانە ب رێڤە دچیت و تا نهۆ وان زێدەتر ژ نیڤ ملیۆن پارچە چەك تۆماركرینە و گۆت ژی» هەر درۆنەكا بێ رازیبوون بهێتە بلندكرن دێ وەكو كریارا تیرۆریستی هێتە هەژمارتن».
میقداد میری ئاشكرا كر كو مۆلەتا تۆماركرنا چەكی دێ ل 31ێ كانوونا ئێكێ یا ئەڤ سالە دوماهی دهێت و هەر كەسەكێ پشتی وی ژڤانی چەكێ بێ مۆلەت و نەهاتییە تۆماركرن ل دەف بیت دێ وەكو دەرچووی ژ یاسایێ هێتە هەژمارتن و دێ تووشی رێكارێن توند یێن یاسایی بیت.
پەیڤدارێ وەزارەتا ناڤخۆ سەپاندنا قەدەغەیا گشتی یا هاتنوچوونێ ل دووماهییا مەها ئیلۆنێ رەتكر و دوپات كر كو چو رێنماییێن ب وی شێوەی نینن. دیسان گۆت كو هەڤپەیمانییا بڕێڤەبرنا دەولەتێ دوپاتی ل سەر دووماهیئینانا چەكێ دەرڤەی دەستێ دەولەتێ كریە و هۆشداری دایە كو هەر چالاكییەك پشتی وێ مۆلەتێ ل گۆرەی یاسایا دژەتیرۆرێ دێ هێتە هەژمارتن .
رۆهنكر ژی، بۆ بجهئینانا ڤێ پرۆسەیێ وان زێدەتر ژ 745 ئۆفیسێن تایبەت ل هەموو پارێزگەهان ڤەكرینە و تا نهۆ وان مۆلەتا چەكی دایە زێدەتر ژ 160 هزار كەسان و دەست ب سەر 143 هزار چەكێن نەیاسایی دا گرتینە و دوو هزار و 668 پارچە چەكێن دزی هاتینە ئاشكراكرن.
