وەلاتیێن شنگالێ پارەی بۆ ب رێڤەبرنا کاروبارێن خوە ل مووسل ددەن
ئەڤرۆ نیوز، لەزگین جوقی:
وەلاتیێن قەزا شنگالێ بۆ ئەڤرۆ نیوز دیار دکەن کو ئەو بۆ ب رێڤەبرنا کاروبارێن خوە ل دامودەزگەھێن مووسل پارەی ددەن و ھەکە رێڤەبەریەک ژی بۆ چێکرنا مامەلان و وەرگرتنا پەنچەمۆران بھێتە د ناڤ کەمپان دا حەفت ھزار دیناران ژ ھەر کەسەکی وەردگرن.
ئیبراھیم خەیری، ئێک ژ وەلاتیێن شنگالێ یە بۆ ئەڤرۆ نیوز دیار کر کو دەمێ ناڤەکی ل سەر پلێتا ئاھێن خوارنێ زێدە بکەن ل مووسل ئەو 35 ھزار دیناران ددەنە شۆفێران ھەتا بۆ وان وێ مامەلێ دبەن مووسل و چێدکەن و گۆتک گئەڤ پارە ژی ل سەر ئاواران بارگرانی یەن چونکی ئاوارە ب خوە د ھەژارن و نەشێن ڤی کوژمێ پارەی بدەن.
ناڤھاتی ئاماژە دا وێ چەندێ کو ئەو دخوازن حەفتیێ یان ھەیڤێ جارەکێ رێڤەبەریێن مووسل بۆ ب رێڤەبرنا کاروبارێن ئاواران بھێنە د ناڤ کەمپان چونکی ئاواران پێ نەخۆشە بچنە مووسل.
ژ ئالیێ خوە ڤە قاسم جوقی خەلکی تل عزێز ل قەزا شنگالێ بۆ ئەڤرۆ نیوز دیارکر کو رەوشا مووسل یا خوەش نینە و ئەو نەشێن بۆ ب رێڤەبرنا کاروبارێن خوە سەرەدانا مووسل بکەن و گۆت: “دەمێ دچینە مووسل ژی پارە بۆ ب رێڤەبرنا مامەلان ژ مە دھێنە وەرگرتن”.
حەسەن خەلەف، ئێک ئاواریێن شنگالێ یە نوکە ل کۆمەلگەھا شاریا ئاکنجیی یە بۆ ئەڤرۆ نیوز دیار کر کو بەر سالەکێ وی 30 ھزار دینار دابوونە کەسەکی ئەڤە سالەک بسەرڤەچوو ھێشتا ناڤێ زارۆیەکێ وی ژ پلێتا وی یا ئاھێن خوارنێ نەھاتیە جوداکرن و گۆت: “دەمێ ئەم پیسیار ژی دکەین دبێژن دێ چێبیت و چو دیارنینە”.
