وەلاتێن ئورۆپا دەست ب پێرابوونێن نوو دژی ھشکباوەران دکەن
ئەڤرۆ:
دوھی کۆمبوونەکا بەرفرەە ب پشکداریا وەزیرێن دەرڤە یێن ٢٨ وەلاتێن ئێکەتیا ئورۆپا ل باژارێ بروکسل برێڤە چوو و تێدا پەیوەندیێن ل گەل روسیا و مەترسیا تیرۆرێ ل ئورۆپا ھاتە گەنگەشە کرن.
پشتی کۆمبوونێ وەزیرێ دەرڤە یێ فرەنسا راگەھاند کو مەترسیا تیرۆرێ ل ئورۆپا زێدە دبیت و ئەم وەک وەلاتێن ئەندامێن ئێکەتیا ئورۆپا نەچارین کو دەست ب پێرابوونێن نوو بکەین و دڤێت ئەم ئێمناھیا وەلاتێ خوە ب پارێزین و نەھێلین کو گرۆپێن ھشکباوەر ئالۆزیێن ناڤخوەیی بۆ مە دروست بکەن و نھا پرانیا وەلاتێن ئورۆپا دەست ب ھەوەکا باش یا گرتنا ئەندامێن رێکخراوێن تیرۆرستی یێن وەک داعش و قاعیدە ل ئورۆپا کرینە و ئەز باوەرم پشتی ڤێ کۆمبوونێ دێ بشێین ب رەنگەکێ گەلەک باش دووڤچوونا وان کەس و ئالیان بکەین کو دخوازن ھێرشێن تیرۆرستی ل ئورۆپا ئەنجام بدەن و گۆت: ( ئازادیا راگەھاندنێ و دیموکراسی بنەمایێ ئێکەتیا ئورۆپانە و ئەم ب چو رەنگەکێ ناھێلین کو ھشکباوەر ببنە ئەگەرێ لاوازیا دیموکراسیێ ل ئورۆپا و ژ بەر ڤێ یەکێ ژی د کۆمبوونێ دا پرانیا وەلاتێن ئورۆپا بەرھەڤیا خوە بۆ ژناڤبرنا گرۆپێن ھشکباوەر ل ئورۆپا دیار کرینە و ھەروەسا ئەم بریار دایە کو پتر ھاریکا عیراق و سووریێ بکەین دا وان رێکخراوێن تیرۆرستی ژناڤ ببەین).
ئاژانسا رویترز یا نووچەیان ژی د راپۆرتەکێ دا دیار کر کو وەزیرێ دەرڤە یێ ئیسپانیا د کۆمبوونێ دا دیار کریە کو دڤێت قانوونا دانا ڤیزە بۆ وەلاتیێن بیانی بھێتە توند کرن و دڤێت بۆ ماوەیەکێ ڤیزە بۆ ھەر کەسەکێ نەھێتە دان و ھەروەسا دڤێت ڤیزا شنگن ژی بھێتە سنۆردار کرن و دڤێت چاڤدێریەکا باش ل سنۆرێ وەلاتێن ئێکەتیا ئورۆپا دا بھێتە کرن دا کو بشێن رێگریێ ل ھەمبەر چالاکیێن وان گرۆپێن تیرۆرستی دروست بکەین.
