وەکھەڤی خزمەتا عیراق و ئیمارات ناکەت
ئەڤرۆ نيوز:
یاریێن گەرا پێنجێ یێن قوناغا ئێکێ ژ ڤاڤارتنێن کێشوەرێ ئاسیا بەر ب دەربازبونێ بو یاریێن دووماھیا کاسا نەتەوێن ئاسیا و د ھەمان دەم دا موندیالا ٢٠١٨ ل روسیا بریارە ئەڤرۆ بھێنە کرن و تێدا ھەتا رادەکێ مەزن دێ یاریێن چارەنڤێسازبن بو ھەردو ھەلبژارتیێن عیراق و ئیمارات و تایبەت ھەلبژارتیێ عیراقێ و ئەف ھەردو ھەلبژارتیەَ دێ یاریێن خوە لگەلێک کەن.
ھەلبژارتیێ ئیمارات ئەوا د یاریا بوری دا لگەل ھەلبژارتیێ سعودیێ خوسارەت بووی پێدڤی ب سەرکەفتنێ یە داکو ب لەز ڤەگەریتە ناڤا ھەڤرکیێ و ھیڤیێن دەربازبونێ گەش بکەت چونکو نوکە شەش خال ھەنە و ل رێزا چارێ دھێت ب جوداھیا چار خالان ژ سەرکێشا ڤێ کوما دویێ سعودیا و زێدەتر سێ خالان ژ ھەلبژارتیێ عیراقێ ئەوا ل رێزا بەری دووماھیێ دھێت.
د ڤێ یاریێ دا خوسارەتیا ھەر ئێک ژ ھەلبژارتیێن ئیمارات و عیراق دبیت مەحال بیت بشێن پلێتا دەربازبونێ ب دەستڤە ببەن بو موندیالێ و دیسان وەکھەڤی ژی خزمەتا چو ژ ھەردو ھەلبژارتیان ناکەت.
ل دور ڤێ یاریێ شروڤەکارێ یاریا تەپا پێ نەبیل زەکی ئاشکەراکر کو لسەر راھێنەرێ ھەلبژارتیێ عیراقێ رازی شنێشل پێدڤیە ل ھێلا ھێرشبەریێ پشتبەستنێ لسەر دو ھێرشبەران بکەت داکو فشارێ لسەر یاریزانێن عیراقێ بکەت د دەڤەرێن وان دا نە ل نێزیک ھێلا بەرەڤانیا خوە داکو مەترسیا ھەرسێ ھێرشبەرێن ئیمارات عمر عەبدولرەحمان و عەلی مبخوت و ئەحمەد خەلیل لسەر گولا عیراقێ دورست نەبیت.
