ياريێن گه‌را چارێ ژ خولا نايابا كوردستانێ
ئه‌ڤرۆ نيوز:
بڕياره رۆژا پێجشه‌مبى و ئه‌ينى ياريێن گه‌را چارێ ژ خولا نايابا كوردستانێ بهێنه كرن و ژ ياريێن گه‌له‌ك گرنگ ژى زاخۆ دێ بيته مێڤانا دهۆك و زێره‌ڤانى دێ بيته مێڤانا پێشمه‌رگه‌ى هه‌ولێر.
بڕياره سوبه‌هى رۆژا پێنجشه‌مبى سێ يارى ژ قووناغا چارێ يا خولا نايابا كوردستانێ بۆ ته‌پا پێ بهێنه كرن كو د گرنگترين ياريا سوبه‌هى دا، هه‌ردو تيمێن پێشمه‌رگه‌ى هه‌ولێر و زێره‌ڤانى دێ رووى ب رووى ئێك بن ل ياريگه‌ها پێشمه‌رگه‌ى هه‌ولێر ل مه‌سفى و گرنگيا ڤێ ياريێ د وێ چه‌ندێ دايه، دێ ئه‌ڤ هه‌ردو يانه هێنه هه‌لسه‌نگاندن كو پترترين پاره ل ڤى وه‌رزى ل تيمێن خوه مه‌زاختيه.
هه‌ر دياريێن سوبه‌هى دا، هندرين دێ سلێمانى ل ياريگه‌ها خوه مێڤان كه‌ت و پێشمه‌رگه‌ى سلێمانى ژى دێ بيته مێڤانا شێروانه ل كه‌لار.
ل رۆژا ئه‌ينى ژى هه‌موو چاڤ دێ به‌ر ب كلاسيكۆيا پارێزگه‌ها دهۆك چن، ئه‌وا دهۆك دێ مێڤانداريا زاخۆ كه‌ت ل ياريگه‌ها خوه يا سيێ كو دهێته چاڤه‌رێكرن هه‌ڤركيه‌كا باش ب خوه ڤه ببينيت.
د ياريێن دى يێن رۆژا ئه‌ينى ژى دا، هه‌ولێر دێ برايه‌تى ل ياريگه‌ها دويێ يا شه‌هيد فره‌نسۆ هه‌ريرى مێڤان كه‌ت و كه‌ركووك ژى خودانا رێزا دووماهيێ دێ نه‌ورۆزا سه‌ركێشا كۆمێ مێڤان كه‌ت.
نوكه نه‌ورۆز ل سه‌ر ليستا خولا ناياب كوردستانێ دهێت ب 9 خالان ژ سێ سه‌ركه‌فتنان ل دووڤ ئێك و پاشان ئارارات ل رێزا دويێ دهێت ب دو سه‌ركه‌فتن و خوساره‌تيه‌كان و زێره‌ڤانى ژى ب سه‌ركه‌فتنه‌ك و دو وه‌كهه‌ڤيان ل رێزا سيێ دهێت، هه‌ردو نوونه‌رێن دى يێن پارێزگه‌هێ ژى دهۆك و زاخۆ ب چار خالان ل رێزێن شه‌شێ و حه‌فتێ دهێن.
