يانا زاخۆ ل ياريگه‌ها خوه هاته دوراندن
ئه‌ڤرۆنيوز:
دچارچۆڤێ گه‌را 23 ژ خۆلا عيراقێ بۆ پلا ناياب، ئێڤاريا ئه‌ڤرۆ ئه‌ينيێ 20/4/2018، يانا زاخۆ ل ياريگه‌ها خوه ل سه‌ر ده‌ستێ يانا شورته ب ئه‌نجامێ 1-2 هاته دوراندن.
يانا شورته ل خۆله‌كا 12 ب گوله‌كێ پێشكه‌فت كو ژلايێ ياريكه‌رێ وێ موهه‌نه‌د عه‌لى كازم هاتيه تۆماركرن، به‌لێ هه‌ر زوو يانا زاخۆ شيا گۆلا وه‌كهه‌ڤيێ ل خۆله‌كا 19 ب رێيا ياريكه‌رێ خوه ستار ياسين تۆمار بكه‌ت، گۆلا دويێ وسه‌ركه‌فتنێ بۆ يانا شورته ژلايێ ياريكه‌ر عه‌لا عه‌بدولزه‌هره ل خۆله‌كا 65 هاته تۆماركرن.
ب ڤى ئه‌نجامى خالێن يانا زاخۆ هه‌ر مانه 19 خال ول رێزا 19 وبه‌رى دووماهيێ دهێت ويانا شورته خالێن خوه گه‌هاندن 49 خالان ول رێزا دويێ دهێت.
