٢٦ێ گولانێ
سالح دۆسكی
کەسێ نە دگۆت دێ بهار زڤڕیت،
دەمێ ئاخ بووی خەمەکا گران ل سەر ملان
و چیا د بن بەفرێ دا مای بێ خودان
تارستانەکا تەمام بوو…
بەلێ ل شەڤا بیست و شەشێ گولانێ
دیمەن هاتە گوهۆڕین؛
تڤەنگێ د بێدەنگیێ دا گۆت: بەسە.
ئەو شەڤ بوو پرەک
د ناڤبەرا مرن و مانێ دا…
ژ گەرویا بریندار یا ڤێ وەلاتی
سرودەکا كەڤنارا ئازادیێ دەركەفت
چەنگێ تاریستانێ پێ شكەست
ل ئاڤ و با و ئاخێ ڤەژەنین ڤە هەست و
کەفتە د ناڤ دەمارێن هەبوونێ دا…
گولان… شۆرەش
نە پەیڤ بوو لسەر کاغەزێ
نە حەزەك بوو دا بەر لەزێ
هەبوونەك بوو ژ هەبوونێ
لافاوەکا ئاخپەرستنا سكرشكێن بوو،
ژ دلێ زەلامێن چیا هەلگرتین دەستپێكر
ئەوێن
مرن كرین دنیڤا چاڤێن خۆدا
و ل سەر پەلا مەشیاین
ژیان بەخشین
بەفر پاراستین
هەتا ئەڤرۆ
تەڤ كانی و رووبار
پێ تژینە…
ئەو ٢٦ێ گولانێ بوو،
دەمێ تڤەنگ بوویە پێنوس،
و ل سەر سینگی ئەردی نڤیسی:
گەل نامریت، باز دێ فڕیت و
كەس نەشێت رێكا مە بگریت…
