٥٠ ھزار کورد و تورکمانێن شیعە نەشێن بچنە قەیرەوان
دھۆک، لەزگین جوقی:
رێڤەبەرێ ناحیا قەیرەوان دیار کر کو ٤٠ ھزار کەسێن کورد و ١٠ ھزار کەسێن تورکمانێن شیعە ژ بەر شانێن نڤستی یێن تیرۆرستێن داعش و حەشدا شەعبی نەشێن ڤەگەرنە سەر مالێن خوە.
عەبدولحەمید قاسم، رێڤەبەرێ ناحیا قەیرەوان بۆ ئەڤرۆ نیوز دیار کر کو ڤالاتیا ئەمنی ل دەڤەرا قەیرەوان و بەعاج ھەیە و مەترسیی ھەیە شانێن نڤستی یێن داعش جارەکا دێ خوە لێک بدەن بۆ ئەنجامدانا کارێن تیرۆری ل دەڤەرێ، ئەڤە ژی بوویە مەترسی ل سەر خەلکی و نەشێن ڤەگەڕن و گۆت: “ب تایبەتی کوردان باوەری ب ھێزین عیراقی ل دەڤەری نینە ھەتا بشێن پشتراست ڤەگەڕنە سەر مالێن خوە، ھەتا نوکە ژی چو خێزانیێن کورد نەزڤرینە ناحیا قەیرەوان بۆ دەست پێکرنا ژیانا خوە، بتنێ ھندەک خێزانیێن کێم زڤرینە ئەو ژی گرێدایی حەشدا عەشائیری و حەشدا ئێزدی نە وەکو دیتر خەلک نەشێن ڤەگەرن”.
ناڤھاتی ئاشکرا کر کو بەری تیرۆرستێن داعش ھێرشی سەر قەیرەوان بکەن ٨٠ ھزار کەس ل قەیرەوان د ژیان ژوان ژی ٤٠ ھزار کورد بوون و ٣٠ ھزار عەرەب و ١٠ ھزار ژی تورکمانێن شیعە بوون، نوکە بتنێ عەرەب یێن زڤرینە سەر مالێن خوە و ھێشتا کورد نەشیاینە ڤەگەڕن، ژ بەر مەترسیا شانێن نڤستی یێن تیرۆرستان و حەشدا شەعبی و نەبوونا تەناھیێ ل دەڤەرێ و گۆت: ” دەە گۆندێن تورکمانێن شیعە ل قەیرەوان ھەبوون بتنێ نوکە ھندەک جاران دەمێ وەرزێ چاندنێ دەست پێ دکەت جۆتیار د زڤرن بۆ چاندنا دەخلودانی”.
