٨٠% ژ نەساخیان ب ڤێ رێکێ دھێنە ڤەگوھاستن
ئەڤرو نیوز ، نەوزاد ھلوری:
ئەندامێن لەشێ مروڤی ب گشتی و دەست ب تایبەتی ئەگەرێن سەرەکی نە کو نەساخیان ژ ژینگەھا دەرڤە بۆ ناڤ لەشێ مروڤی ڤە ب گوھێزن ، و نوشدارەک ددەتن دیارکرن کو ٨٠% ژ نەساخیێن ژ دەرڤە ب رێیا دەستان بۆ مروڤی دھێنە ڤەگوھاستن.
دکتور “ئەیوب عەبدوللا مێرگەسووری ” تایبەتمەندێ نەشتەرگەریا گشتی دیارکر کو ھندێ پاراستن ھەبیت چارەسەری کێمترە بۆ ئەڤرو نیوز گۆت: (ب شێوەیەکێ گشتی ھەموو ئەندامێن لەشێ مروڤی ھەر ئێک ژ وان بەھرا خوە د ڤەگوھاستنا نەساخیان ژ ژینگەھا دەرڤە بو ناڤ لەشێ مرۆڤی ھەیە ئەڤجا چوو ژ کەسەکێ دن بیت یان تشتەکێ نوو ، بەلێ بەھرا پتریا وان کو مروڤ دکاریت بێژیت ھەتا ٨٠% ژ وان نەساخیێن کو ب نەخوشێن ڤەگوھێز دھێنە ھژمارتن ب رێیا دەستان بۆ ناڤ لەشێ مروڤی دھێنە ڤەگوھاستن)
زێدەتر گۆت: (بەھرا پتریا وان نەساخیێن کو ب ئەگەرا دەستان بۆ ناڤ لەشێ مروڤی دھێنە ڤەگوھاستن نەساخیێن ڤایروسی نە وەکو ھەموو جورێن ئەنفلونزا و پەرسیف و میکروب و گەلەک نەساخیێن دن)
مێرگەسوری دیارکر ژی کو پێدڤی یە مرۆڤ رۆژانە سێ جاران دەستێن خوە ب ئاڤ و سابوونێ ب شووت و گۆت ژی: (شووشتنا دەستان ب ئاڤ و سابوونێ باشترین چارەسەرکە کو دبیتە سەدەما رێگرتن ژ نەساخیێن ژینگەھا دەرڤە بۆ ناڤ لەشێ مرۆڤی ، ب تایبەتی ئەگەر مروڤ ژ کارەکێ مینا چوونا دەستئاڤێ یان دەستکاریکرنا ھندک جورێن دەرمان و مادێن کیمیایی ، ب شێوەیەکێ گشتی دەما مروڤ ژ ھەر کارەکێ ب دووماھی دھێت پێدڤی یە دەستێن خوە ب شووت ب تایبەتی د نھادا کو نەساخیا کولێرایێ بەر ب زێدەبوونێ ڤە دچیت)
