پارتی فوئاد حسێن و نەوزاد هادی بۆ پۆستێ سەرۆككۆماری بەربژار دكەت
پارتی دیموكراتی كوردستان هەر ئێك ژ فوئاد حسێن و نەوزاد هادی بۆ پۆستێ سەرۆككۆمارێ ئیراقێ بەربژاركرن.
ل دووڤ پێزانینێن كوردستان 24 كو ژ ژێدەرەكێ بلند وەرگرتین، پارتی دیموكراتی كوردستان هەردو ئەندامێن مەكتەبا سیاسی فوئاد حسێن و نەوزاد هادی، بۆ پۆستێ سەرۆككۆمارێ ئیراقێ بەربژاركرینە.
هەر ل دووڤ وان پێزانینان، پارتی سیڤییێن وان هەردو بەربژاران پێشكێشی دەستەیا سەرۆكایەتییا جڤاتا نوونەرێن ئیراقێ كرینە، ئەڤە د دەمەكیدایە ل سات سێ ئێڤاریا رۆژا دوشەمبی 5/1/2026 دەرگەهێ خوەبەربژاركرنێ بۆ وی پۆستی هاتە گرتن كو 50 كەسان خوە بەربژاركریە.
فوئاد حسێن كی یە؟
– فوئاد محەمەد حسێن بەگ، ل سالا 1946 ل باژێرێ خانەقینێ ژ دایكبوویە.
– ل سالا 1967 بوویە ئەندامێ ئێكەتییا قوتابیێن كوردستانی.
– ل سالا 1971 پشكا زمانێ ئینگلیزی ل كولیژا پەروەردەیێ ل زانكۆیا بەغدایێ تمامكریە.
– ل سالا 1974 پەیوەندی ب هێزێن پێشمەرگەی كریە.
– ل سالا 1975 پشتی نسكۆیا شۆڕشا ئیلۆنێ، ل هۆلەندا بوویە پەناهندە.
– ل سالا 1976 بوویە سكرتێرێ كۆمەلەیا خویندكارێن كوردستانێ ل دەرڤەی وەلاتی.
– ل سالا 1987 بوویە جێگرێ سەرۆكێ ئینستیتیوتا كوردی ل پاریس.
– ل سالا 1984 ژ ناڤا رێزێن ئێكەتی نیشتمانی كوردستان چوویە دەر و وەك كەسایەتییەكێ سیاسیێ سەربخوە د كارێ سیاسیدا بەردەوامبوو.
– ل سالێن 1984-1995 مامۆستا بوو ل ئەكادیمییا زانستێن جڤاكی.
– ل سالێن 1995 – 1996 رێڤەبەرێ كارگێریێ رێكخراوا پەناهندەیێن حكومی بوو.
– ل سالێن 1996 – 2003 رێڤەبەرێ نڤیسینگەها رۆژهەلاتا ناڤین بۆ ڤەكۆلین و راهێنانێ بوو.
– ل سالا 2003 پشتی ژناڤچوونا رژێما بەرێ یا ئیراقێ، زڤریە ئیراقێ و ل وەزارەتا پەروەردەیێ دەستبكاربوویە و سەرپەرشتێ داڕێشتنا پرۆگرامێ خواندنێ بوو.
– ل سالا 2005 ل گەل دامەزراندنا سەرۆكایەتییا هەرێما كوردستانێ، بوویە سەرۆكێ دیوانا سەرۆكایەتییا هەرێما كوردستانێ.
– ل سالێن 2018 – 2020 ل كابینەیا عادل عەبدولمەهدی، وەزیرێ داراییا ئیراقێ بوو.
– ل سالا 2020 هەتا نوكە وەزیرێ دەرڤەیێ ئیراقێ یە.
پشكداری د كۆنگرەیێن ئۆپۆزسیۆنێ دا :
– 1991 كۆنگرەیێ بەیروت، 1992 كۆنگرەیێ ڤییەنا، 1999 كۆنگرەیێن واشنتۆن و پیرمام، 2002 كۆنگرەیێ لەندەن.
– فوئاد حسێن، ژبلی زمانێ كوردی، زمانێن عەرەبی، ئینگلیزی و هۆلەندی ژی دزانیت و هەلگرێ باوەرنامەیا دكتۆرایێ یە د هەڤبەندیێن نێڤدەولەتیدا.
نەوزاد هادی كی یە؟
نەوزاد هادی مەولود محەمەد، ئەندازیار و سیاسەتمەدارەكێ دیار یێ هەرێما كوردستانێیە كو ب درێژییا سالان د چەندین پۆستێن بلند یێن حزبی و حكومیدا خزمەت كریە.
– ل سالا 1963 ل باژێرێ هەولێرێ ژ دایكبوویە. خواندنا ئەكادیمی د وارێ ئەندازیاریێدا تمام كریە و ل سالا 1987 باوەرنامەیا بەكالۆریۆس ب ئەندازیارییا كارەبێ ل زانكۆیا سەلاحەدین ل هەولێرێ ب دەستڤەئینایە.
– شارەزایی د زمانێن كوردی، عەرەبی، ئینگلیزی و فارسی دا هەیە.
– خێزاندار و سێ كۆر و كچەك هەنە.
– ل سالا 1992 پەیوەندی ب رێزێن پارتی دیموكراتی كوردستان كریە و كاروانێ وی یێ سیاسی ب ڤی شێوەیێ خوارێ بوو:
– ل سالێن 1992- 1996 وەك ئەندازیار ل مەكتەبا ناڤین یا راگەهاندنا پارتی دیموكراتی كوردستان كاركریە، ب تایبەتی ل رادیۆیا دەنگێ كوردستان و تەلەڤزیۆنا كوردستان.
– ل سالێن 1996 – 2004 ل كابینەیا سیێ یا حوكمەتا هەرێما كوردستانێ، پۆستێ بریكارێ وەزارەتا ڤەگوهاستن و گەهاندن وەرگرت و هەتا سالا 2004 د وی پۆستیدا بەردەوام بوو.
– ل سالێن 2004 هەتا 2019 بۆ دەمێ 15 سالان وەك پارێزگەرێ هەولێرێ كاركریە. د دەمێ پۆستێ خوەدا، هەولێرێ گوهۆڕینەكا مەزن ب خوەڤە دیت و زێدەتر ژ 14 هزار پڕۆژە ب گۆژمەیێ 10 ملیار دۆلاران هاتنە ئەنجامدان.
– ل سالا 2019 پشتی نەمانا وی ل پۆستێ پارێزگەرێ هەولێرێ، وەك شیرەتكارێ سەرۆكێ هەرێما كوردستانێ، نێچیرڤان بارزانی، دەستبكاربوو.
پۆستێن حزبی:
– ل سالا 1999 نوونەرێ كۆنگرەیێ 12 یێ پارتی دیموكراتی كوردستان بوو.
– ل سالا 2010 ل كۆنگرەیێ 13 یێ پارتی، وەك ئەندامێ جڤاتا سەركردایەتیێ هاتە هەلبژارتن.
– ل سالا 2022 ل كۆنگرەیێ 14 یێ پارتی، وەك ئەندامێ كۆمیتەیا ناڤین هاتە هەلبژارتن و پاش بوو ئەندامێ مەكتەبا سیاسی یا پارتی.
– نوكە پۆستێ بەرپرسێ مەكتەبا رێكخستنا پارێزگەها نەینەوا هەیە و كاری بۆ ب هێزكرنا پێگەهێ پارتی ل وێ دەڤەرێ دكەت.
– نەوزاد هادی ئێكە ژ وان كەسایەتیێن كو د دەمێ كاركرنێدا، ب تایبەت د پۆستێ پارێزگەرێ هەولێرێ دا، رۆلەكێ بەرچاڤ د گەشەپێدانا باژێرێ هەولێرێ دا هەبوو.
