پارێزگارێ دهۆكێ تیمه‌ك و چه‌ند یاریزانێن دهۆكێ خه‌لاتكرن
ئه‌ڤرۆ،
دوهی ل كۆچكا پارێزگه‌هێ د. عه‌لی ته‌ته‌ر پارێزگارێ دهۆكێ پێشوازیا شاندێ یانا دهۆك كر ب سه‌رۆكاتیا د. عه‌بدوللا جه‌لال سه‌رۆكێ یانێ ژبۆ خه‌لاتكرنا تیما ته‌پا پێی یا لاوێن یانا دهۆك خودانێن رێزا دویێ د خولا پلا ئێكا ئیراقێ دا و ده‌ربازبووینه پلا نایاب و هه‌روه‌سان ئه‌و یاریزانێن ناسناڤێن ئیراقێ و نێڤده‌وله‌تی ب ده‌ستڤه ئیناین كو هه‌ر ئێك ژ دو یاریزانێن یاریا كیك بۆكسینگێ، دو یاریزانێن پایسكلان و سێ یاریزانێن تێنسا ئه‌ردی و یاریزانا فۆتسالێ ل باژێرێ ئاكرێ بوون.
د پێشوازیێ دا پارێزگارێ دهۆكێ ده‌ستخۆشی ل هه‌موو یاریزانێن قاره‌مان كرن و ده‌ستكه‌فتێن وان ب دیرووكی و مه‌زن دانه دیاركر و هه‌روه‌سان خۆیاكر ل دووڤ شیانا پارێزگه‌ها دهۆكێ و كابینا نه‌هێ یا حوكمه‌تا هه‌رێما كوردستانێ به‌رده‌وام پشته‌ڤانه بۆ وه‌رزشێ سه‌رباری قه‌یرانێن دارایی و رۆلێ وه‌رزشڤانان وه‌كو هه‌ر پێشمه‌رگه‌یه‌كی بۆ ناڤێ كوردستانێ به‌رگریێ دكه‌ن، هه‌روه‌سان ده‌ستخووشیا یانا دهۆكێ كر و داخواز به‌رده‌وامیا ده‌ستكه‌فتان بۆ كر.
د. عه‌بدوللا جه‌لال سه‌رۆكێ یانا دهۆك بۆ رۆژناما ئه‌ڤرۆ گۆت: سۆپاسیا پارێزگارێ دهۆكێ د. عه‌لی ته‌ته‌ر دكه‌ین كو هه‌رده‌م پالپشت و پشته‌ڤانێ وه‌رزشا پارێزگه‌ها دهۆكێ ب گشتی و یانا دهۆكێ ب تایبه‌ت بوویه ئه‌ڤچه‌نده ژی خاله‌كا گرنگه ژبۆ پێشكه‌فتنا ئاستێ وه‌رزشێ و هه‌روه‌سا پووته‌دانه ب شیانێن گه‌نج و لاوێن باژێرێ خوه، خه‌لاتكرنا یاریزانێن لاوان یێن تیمێن ته‌پا پێی، كیك بۆكسینگ، پایسكلان و تێنسا ئه‌ردی باشترین پالده‌ره بۆ یاریزانان ئه‌و زێده‌تر خوه ماندی بكه‌ن و ناڤێ دهۆكێ و كوردستانێ د قاره‌مانێن ئیراقێ و ده‌رڤه دا بلند بكه‌ن، دووباره سۆپاسیا پارێزگارێ دهۆكێ د. عه‌لی ته‌ته‌ر دكه‌ین ب هیڤییا وێ یه‌كێ بۆ خول و قاره‌مانیێن داهاتی دا ئه‌ڤ پشته‌ڤانیه به‌رده‌وامبن پێخه‌مه‌ت بشێن ئه‌نجامێن مه‌زن و ده‌ستكه‌فتان ب ده‌ستڤه بینن.
