پارێزگارێ دهۆكـێ 56 سالییا دامەزراندنا ئێكەتییا زانایێن ئایینێ ئیسلامێ پیرۆز كر
ب هەلكەفتا 56 سالییا دامەزراندنا ئێكەتییا زانایێن ئایینێ ئیسلامێ ل كوردستانێ، دوهی 21/9/2026 د. عەلی تەتەر، پارێزگارێ دهۆكێ سەرا لقێ دهۆك یێ ئێكەتیا زانایان دا و ژ لایێ د. جیهاد بێسفكی، سەرۆكێ لقێ دهۆكێ یێ ئێكەتییا زانایێن ئایینێ ئیسلامێ ل كوردستانێ و هژمارەكا مامۆستایێن ئایینی پێشوازی لێ هاتە كرن.
د ڕوونشتنەكێ دا پارێزگارێ دهۆكێ 56 سالییا دامەزراندنا ئێكەتیا زانایێن ئایینێ پیرۆزێ ئیسلامێ ل كوردستانێ ل هەموو زانایێن ئایینی و مامۆستایان پیرۆزكر، دیسا ڕۆلێ وان د شوڕەشێن ئێك ل دووڤ ئێك یێن كوردستانێ و دەستپێشخەرییا وان د دانا بنیاتێ بزاڤا ڕزگاریخوازییا نەتەوەیی یا كوردی و خزمەتكرنا پەیاما ئایینی و نەتەوەیی و هشیارییا جڤاكی و موكومكرنا بیروباوەرێن پێكڤەژیانێ دا بلند هەلسەنگاند.
دیسا هەر دوهی 21/9/2026 ب چاڤدێری و ئامادەبوونا د. عەلی تەتەر، پارێزگارێ دهۆكێ و دكتۆرە ڤیان سلێمان، هاریكارا بەرپرسێ مەكتەبا ڕێكخستنا پارتی ل بەهدینان و بریندار حەیدەر، دەڤەردارێ دهۆكێ و ئەمیر عەلی، ڕێڤەبەرێ گشتی یێ ڕەوشەنبیری و هونەری و خدر دۆملی، ڕێڤەبەرێ سەنتەرێ خواندنێن ئاشتییێ و چارەسەریێن ململانێ ل زانكۆیا دهۆك و هژمارەكا ڕێڤەبەرێن دام و دەزگەهێن حكومی، ڕۆژا جیهانی یا ئاشتییێ ژ لایێ دەڤەردارییا دهۆكێ ب هەڤكاری ل گەل ڕێڤەبەرییا گشتی یا ڕەوشەنبیری و هونەری و زانكۆیا دهۆك و ڕێخراوا (Better World) هاتە ساخكرن.
