پانزینا حكومی ل دهۆكێ ب شێوەیێ دیجیتالی دهێتە بەلاڤـكرن
دهۆك، دلۆڤان ئاكرەیی:
دەڤەردارێ دهۆكێ دیاركر، ژ ئەگەرێ ڕەوشا نوكە یا پانزینێ و گرانبوونا بهایێ وێ، كۆمبوونەك ل كۆشكا دەڤەرداریا دهۆكێ، ب ئامادەبوونا رێڤەبەرییا نەفت و كانزایان و رێڤەبەرێ ئاسایشا پارێزگەها دهۆكێ هاتە ئەنجامدان و چەندین بڕیار هاتنە دان.
بریندار حەیدەر، دەڤەردارێ دهۆكێ بۆ رۆژنامەیا ئەڤرۆ گۆت: «د نوكە دا ئەو بڕیارێن هاتینەدان، كەفتینە د بیاڤێ بجهئینانێ دا، نوكە نۆبەیا وەرگرتنا پانزینێ بوویە دیجیتالی و شوفێرێن ترۆمبێلێن تایبەت پێنج رۆژان جارەكێ مافێ هەی پانزینێ وەربگرن، یێن كرێ ژی سێ رۆژان جارەكێ مافێ هەی پانزینێ وەربگرن، ئەو پانزینخانەیێن ئەڤ سیستەمە لێ دهێتە بجهئینان، ب چو رەنگەكی نابیت، چو بەرهەمێن سۆتەمەنییێ نە بازرگانی و نە ئیشتیراك لێ بهێنە فرۆتن، دیسا نابیت چو جۆرە كەرەستەیەك ل سەر جاددان ب مەرەما گرتنا نووبێ بهێتە دانان».
گۆت ژی: «پێدڤی یە هەمی سازیێن فەرمی و ئەمنی د هاریكاربن بۆ رێكخستنا بەلاڤكرنا پانزینا حكومی، هەر سەرپێچیەكا بهێتە كرن، وەلاتی دشێن ب رێكا هەژمارا گازندەیان بگەهینن، كو ژمارەكا فەرمی یە و ل هەموو پانزینخانەیێن دهۆكێ هاتیە هەلاویستن، د نوكە دا ئەڤ سیستەمێ دیجیتالی ل سەنتەرێ دهۆكێ و دەڤەرداریا سێمێلێ دهێتە بجهئینان و رۆژانە دێ دەمژمێر هەشتی سپێدێ پانزینا حكومی هێتە بەلاڤكرن».
