پتریا بەرهەمێ كارگەهێن هەرێمێ دچیتە پارێزگەهێن ناڤەڕاست و باشوورێ ئیراقـێ
هەولێر، قائید میرۆ:
بەرپرسەكێ دەستەیا وەبەرهێنانێ دیاركر، ل هەرێما كوردستانێ 411 كارگەهێن پیشەسازی هەنە و دبێژیت: پتریا بەرهەمێ وان دچیتە پارێزگەهێن باشوور و ناڤەڕاستێ ئیراقێ و پێدڤیێن بازاڕێ ناڤخۆیی ژی تژی كرینە.
دكتۆر پشتیوان حەمە سەعید، رێڤەبەرێ باژێڕ و دەڤەرێن پیشەسازی ل هەرێما كوردستانێ بۆ رۆژناما ئەڤرۆ دیاركر، ل ڤان سالێن دوماهیێ كەرتێ پیشەسازی ل هەرێما كوردستانێ گەلەك پێشڤەچوویە و نوكە گەهشتیە ئاستەكێ بلند و گۆت: «ب تنێ ل كەرتێ پیشەسازی 411 مۆهلەت هاتینەدان و هەموو پڕۆژەیێن كەرتێ پیشەسازی كار دكەن، ئەڤە ژی بوویە ئەگەرێ ڤەژاندنا كەرتێ پیشەسازی ل هەرێمێ، هەروەسا دەلیڤەیێن كاری ژی ب رێیا ئەڤان پڕۆژەیێن پیشەسازی بۆ وەلاتیان پەیدابووینە و ب هزاران وەلاتی بووینە خودان كار».
دكتۆر پشتیوان حەمە سەعید گۆت ژی: «كارگەهێن پیشەسازی خواست و پێدڤیێن بازاڕێ ناڤخۆیی تژی كرینە و بەرهەمێ زێدە ژی هەیە، لەوڕا د دەمێ نوكە دا 70% یا بەرهەمێ كارگەهێن هەرێما كوردستانێ دچیتە پارێزگەهێن باشوور و ناڤەڕاستا ئیراقێ، ب تایبەتی بەرهەمێ چیمەنتۆیێ».
