پتریا وەلاتیان ژ پرۆژەیێ «رۆناكی» د رازینە و داشكاندنێن نوو د ڕێ دانە
دلۆڤان ئاكرەیی
جێگرێ ڕێڤەبەرێ نڤیسینگەها سەرۆك وەزیرێن هەرێما كوردستانێ دیاركر، پرۆژەیێ رۆناكی سەركەفتنەكا مەزن د كێمكرنا تێچوویێ كارەبێ دا تۆمار كریە و نوكە ٨٠٪ێ پشكداران پارەكێ كێمتر ژ یێ جاران ددەن، ب ئاوایەكێ كو د مەها شوباتێ دا پسۆلێن نێزیكی نیڤا پشكداران تنێ ٣٦ هزار دینار بوون؛ ئەڤە ژی گرۆڤەیە ل سەر گونجاندنا وەلاتیان دگەل سیستەمێ نوو و دویركەفتن ژ ب هەدەردانێ.
عەزیز ئەحمەد، جێگرێ ڕێڤەبەرێ نڤیسینگەها سەرۆك وەزیرێن هەرێما كوردستانێ بۆ رۆژنامەیا (ئەڤرۆ) دەربارەی دەنگۆبێژێن جوداهیا بهایێ یەكەیێن كارەبێ گۆت: چ بنەما بۆ ڤان ئاخفتنان نینن و بها بۆ هەمی هەڤبەشان وەك ئێكە و سیستەمێ برینا كارەبێ ب شێوەیەكێ مرۆڤایەتی هاتیە داڕێژان و كارەبا چ وەلاتیەكی ئێكسەر ناهێتە برین، بەلكو ٥٠ رۆژ مۆلەت هاتینە دیاركرن و سێ جاران ئاگەهداری بۆ دچیت و هەكە د وێ ماوەی دا پارە نەهاتە دان، سیستەم ب شێوەیەكێ ئۆتۆماتیكی كارەبێ دبڕیت، و پشتی دانا پارەی ژی، پتریا حالەتان د ناڤا ٢٤ دەمژمێران دا كارەب بۆ دزڤریت.
عەزیز ئەحمەد ئامارەكا تایبەت ب دهۆكێ ڤە خستە ڕوو و گۆت: تا نوكە ٧٠٠ هزار پشكدار ل دهۆكێ مفا ژ كارەبا ٢٤ دەمژمێری وەردگرن و زۆرینە ژێ رازینە و ب ئەگەرێ داشكاندنێن حوكمەتێ، نێزیكی ١٠ ملیار دینار بۆ وەلاتیان هاتینە زڤراندن و ل گەل ڤێ چەندێ ژی بڕیار هاتیە دان كو ژ نوكە و پێدا دانانا پێڤەرێن كارەبێ (میزانیە) ل پرۆژەیێن ئاكنجیبوونێ (وەبەرهێنان) بێ بەرامبەر بیت.
ناڤبری زێدەتر گۆت: د چارچۆڤەیێ پێشخستنا خزمەتگوزاریێن سەردەم دا، د سێ مەهێن بهێت دا ئەپلیكەیشنەكا تایبەت ب ناڤێ رۆناكی دێ كەڤیتە كار، كو وەلاتی بشێن ب ئۆنلاین چاڤدێریا مەزاختنا خۆ بكەن و هەروەسا ژ مەها بهێت و پێدا، خزمەتگوزاریێن نوو دێ بۆ سیستەمێ فاكتورا ئەلیكترۆنی هێنە زێدەكرن و د نوكەدا حوكمەتا مۆژیلی ڤەكولینێ یە بۆ داشكاندنەكا دی ل سەر بهایێ كارەبێ، و د نێزیك دا دێ دەستپێشخەریەكا مەزن بۆ پشتەڤانیا وەلاتیان د دابینكرنا بویلەر و سیستەمێن سۆلەر دا ڕاگەهینیت.
