پتر ژ ٥٥ كۆمپانی و 450 كرێكارێن زاخۆ بێ كار ماینە
ژ ئەگەرێ بریارەكا وەزارەتا چاندنێ ل دەرگەهێ نێڤدەولەتی یێ ئیبراهیم خەلیل پتری ٥٥ كۆمپانی و 450 كرێكارێن ئیدارەیا سەربخوە یا زاخۆ بێ كار ماینە.
عەبدوللا حسێن، خودانێ كۆمپانیەكێ یە ل زاخۆ بۆ ڕۆژناما ئەڤرۆ دیاركر، ب مەرەما پشتەڤانیكرنا بەرهەمێ ناڤخوە، وەزارەتا چاندنێ باج ل سەر ئینانا هندەك ژ جۆرێن فێقی زێدە كریە وەكو خۆخ و مژمژە و فڕاولە، د دەمەكێ دا بەرهەمێ ناڤخوە ب تنێ پێدڤیا هەموو خەلكێ هەرێما كوردستانێ پرناكەت، لەوڕا ڤێ بریارێ كاریگەریەكا مەزن ل سەر كارێ مە یێ بازرگانی كریە.
ماهر یاسین، بازرگانەكێ دی یێ زاخۆیە دبێژیت:»ژبەر ڤێ بریارا وەزارەتا چاندنێ د نوكە دا تێچوویێ ئینانا هەر بارهەلگرەكا فێقیێن خۆخ و مژمژە و فڕاولە ژ ٢ هەتا ٣ هزار دولاران گەهشتیە ٧ هەتا ٨ هزار دولاران، ژبەر هندێ ئەگەر ب ڤی شێوەیی بەردەوام بیت، ئەم نەشێین بەردەوامیێ ب ڤێ بازرگانیێ بدەین، ئەڤ بریارە ب تنێ ل دەرگەهێ نێڤدەولەتی یێ ئیبراهیم خەلیل هاتیە بجهئینان.
لەتیف عوسمان، سەرۆكێ ژوورا بازرگانی و پیشەسازی ل ئیدارەیا سەربخوە یا زاخۆ، گۆت:»مە ب نڤیسارەكا فەرمی ب ڕێكا ئیدارەیا سەربخوە یا زاخۆ داخواز ژ وەزارەتا چاندنێ كریە كو ئەڤ بریارە بهێتە هەلوەشاندن، چونكو ئەڤ بریارە ژبلی دەرگەهێ نێڤدەولەتی یێ ئیبراهیم خەلیل ل چ جهێن دی نە هاتیە بجهئینان».
