پتر ژ 72 ھزار پشکنینێن نەخۆشیا ئایدز ل دھۆکێ ھاتینە کرن
ئەڤرۆ:
دوھی 1\12\2014 ل رێڤەبەریا کاروبارێن خوەپاراستنێ رۆژا جیھانی یا ئایدزێ ب چەندین چالاکی و سمیناران ھاتە ساخ کرن و بریارە بۆ دەمێ چەند رۆژان ئەڤ چالاکیە یا بەردەوام بیت.
د. سیروان محەمەد رێڤەبەرێ کاروبارێن خوەپاراستنێ ل پارێزگەھا دھۆکێ بۆ ئەڤرو دیارکر رێڤەبەریا کاروبارێن خوپاراستنێ ب ھەڤکاریا رێڤەبەریا گشتی یا ساخلەمیا دھۆکێ رۆژا جیھانی یا نەخۆشیا ئایدزێ ب چەندین چالاکی و سمینارێن رەوشەنبیریا ساخلەمیێ ھاتە ساخ کرن، گوت ژی ھەتا نوکە پتر ژ 72 ھزار پشکنینا بۆ نەخۆشیا ئایدز ل دھۆکێ ھاتینە ئەنجام دان.
گوت ژی ل گورەیی راگەھاندنا وەزارتا ساخلەمیا حوکمەتا ھەرێما کوردستانێ ل ھەر سێ پارێزگەەَن ھەرێمێ 17 حالەت ل سالا 2013 ھاتینە تۆمار کرن و ل دھۆکێ ژی سێ حالەت ھەبووینە ئەو ژی وەلاتیێن ھەرێمێ بووینە ل دەرڤەیی وەلاتی ڤەگەریا بوون و ھەتا نوکە ل سالا 2014 چو حالەت نەھاتینە تۆمار کرن.
دیار کر ژی ئەو حالەتێن ئەڤ سالە ل دھۆکێ ھاتینە تۆمار کرن پشتی دو کەسێن بیانی دڤیان بھێنە ئاخا ھەرێمێ و پشتی پشکنین بۆ ھاتینە کرن دیار بوویە ئەڤ نەخۆشیا ھەی لەورا دووبارە ھاتنە ڤەگەران بۆ وەلاتێن وان دا کو چارەسەری بۆ وان بھێنە کرن.
دیارکر بەراورد ل گەل ئەو ئامارێن ل وەلاتێن جیرانێن عیراقێ دھێنە تۆمار کرن ل ھەرێما کوردستانێ رێژەکا گەلەک کێم ھەیە، ل دۆر خوە پاراستنێ ژ ڤێ نەخۆشیێ گۆت خوە دوور کرن ژ کریارێن سکسی یان ژی بکار ئینانا کاندومی دەمێ کریارا سکسی ژ دەرڤەیی ژیانا ھەڤژینێ دکەت و چەندین رێیێن دی یێن خوە پاراستنێ ھەنە.