پرکرنا فۆرمێن پارچێن ئەردی چ ڕامان بۆ نینە
ئەڤرۆ نیوز:
ئەندامەکێ لژنا چاندنێ ل ئەنجوومەنێ پارێزگەھا دھۆکێ بۆ رۆژناما ئەڤرۆ ئاشکرا کر کو ب تنێ ل پارێزگەھا دھۆکێ ناڤ د کۆمپیوتەری دا بۆ وەرگرتنا پارچێن ئەردی ھەنە و ل پارێزگەھێن دی ئەڤ ئاریشە نینە و پرکرنا فۆرمێن پارچێن ئەردی چ ڕامان بۆ نینە، ھەروەسا وەزیرا باژێرڤانی و گەشت و گۆزارێ ژی رەتکر دوبارە فۆرمەکا نوو یا گرێدای بەلاڤکرنا ئەردی بەلاڤ بکەن.
سەباح بابیری، ئەندامێ لژنا چاندنێ ل ئەنجوومەنێ پارێزگەھا دھۆکێ دیار کر، پرۆژێ بەلاڤکرنا فۆرمێن پارچێن ئەردی یێ وەزارەتا باژێرڤانی و گەشت و گۆزارێ یا حوکمەتا ھەرێما کوردستانێ یە و گۆت: “ل پارێزگەھێن ھەولێر، سلێمانیێ و ھەلەبجە ئەرد یێ ھەی بۆ بەلاڤکرنێ و ھەردەمێ فەرمان ھات دێ ل سەر خەلکی بەلاڤ کەن، لێ ل پارێزگەھا دھۆکێ ئاریشا ئەردی یا ھەی بۆ بەلاڤکرنێ، ھەتا نوکە 22 ھزار ناڤ د کۆمپیوتەری دانە، لێ ھەتا نوکە چاڤەرێ دکەن ھێشتا پارچێن ئەردی وەرنەگرتینە، لەوما بەری نوکە ژی مە ل گەل جھێن پەیوەندیدار ئەڤ چەندە بەحسکریە کو ناڤ نڤیسینا نوکە بۆ وەرگرتنا پارچێن ئەردی دھێتەکرن چ ڕامان بۆ نینە”.
بابیری خویا ژی کر، ھەتا ئەگەر فەرمانا بەلاڤەکرنا پارچێن ئەردی دەر بکەڤیت ژی ل دەستپێکێ دێ بۆ وان بیت یێن بەری نوکە ب چەند سالان رازیبوون ل سەر وەرگرتنا پارچێن ئەردی ھەی.
وی ئەندامێ لژنا چاندنێ ل ئەنجوومەنێ پارێزگەھا دھۆکێ ئاماژە ب وێ چەندێ ژی کر، ل پارێزگەھا دھۆکێ پتر بۆچوون بەر ب وێ چەندێ دچن کو بەلاڤکرنا یەکێن ئاکنجیبوونێ ب شێوێ ستوونی بیت، چونکو ئاریشا ئەردی ل دھۆکێ ھەیە و گۆت: “پرۆژەک ل پارێزگەھا دھۆکی ھەبوو شقە بھێنە دروستکرن و ل شوونا بەلاڤکرنا پارچێن ئەردی و ل سەر فەرمانبەران بھێنە بەلاڤکرن، بەلێ ھەتا نوکە بابەت ئێکلا نەبوویە و ب تنێ پێنگاڤەک بوو وەزارەتێ ھاڤێتی”.
ھەر ل دۆر ڤی بابەتی دوھی 15/6/2016 وەزارەتا باژێرڤانی و گەشت و گۆزارێ رۆنکرنەک دەربارەی بەلاڤکرنا پارچێن ئەردی ل سەر فەرمانبەران بەلاڤکر، تێدا وەزیرا باژێرڤانی و گەشت و گۆزارێ رەتکر دوبارە فۆرمەکا نوو یا گرێدای ب بەلاڤکرنا ئەردی بەلاڤ بکەن و دبێژیت: “چو فۆرمێن نوو بەلاڤ ناکەین، چونکو بەری نوکە مە دو جۆرێن فۆرمان بەلاڤکرینە و ھەتا نوکە نێزیکی 300 ھزار فۆرم ھاتینە بەلاڤکرن”.
ل دووڤ زانیاریان ھەتا نوکە 296 ھزار و 392 کەسان فۆرما وەرگرتنا ئەردی پرکرینە و ژ وێ ھژمارێ ژی نێزیکی 55 ھزار کەس کرێدارن.
نەورۆز مەولوود، وەزیرا باژێرڤانی و گەشت و گۆزارێ ل حوکمەتا ھەرێما کوردستانێ ڕاگەھاند، د ناڤ باژێران دا ئەو دێ ئەردێن 150 مەتری و باژێرکان ئەردێن 200 مەتری و کومەلگەھان ژی یێن 250 مەتری بەلاڤ کەن.
