پشتى دو سالان جوتیارێن دو گوندان ده‌ست ب چاندنێ دكه‌ن
ئه‌ڤرۆ نیوز، نه‌وزاد هلۆرى:
پشتى دو سالان ژ كاركه‌فتنا جویا ئاڤێ یا سه‌ر چاندن و ده‌رامه‌تێ گوندێ گوهه‌رزێ و گوندێ بالاڤا، حوكمه‌تا هه‌رێما كوردستانێ كوژمه‌كێ پاره‌ى بۆ نوژه‌نكرنا جویا سه‌ره‌كى یا وان هه‌ردو گوندان دابینكرن.
جوتیار وان هه‌ردو گوندان ديار دكه‌ن كو ب نووژنكرنا جویا وان یا ئاڤێ، دێ پترى 200 جوتیار مفاداربن و ده‌ست ب چاندنێ كه‌نه ڤه ، به‌لێ نووژه‌نكرنا جویێ كێشه‌یا وان ب دووماهى نائینیت، به‌لكو پێدڤیه سه‌ر ژ نوو جو بهێته خراپكرن و چێكرن.
ئه‌حمه‌د سعه‌دوللا، هه‌لبژێر و جوتیاره‌كێ گوندێ گوهه‌رزێ یه بۆ ئه‌ڤرۆ نیوز گۆت: (ل سالا 1978 جویا گوندێ مه هاتیه چێكرن و ل سالا 1988 ژ ئه‌نجامێ ده‌ست ب سه‌رداگرتنا ده‌ڤه‌رێ ژلایێ رژێما به‌عس ڤه، هاتیه هێلان، پشتى خه‌لكێ گوندى زڤرى ڤه ئه‌و جو ب خرابى بكارئینا، به‌لێ ژبه‌ركو گه‌له‌ك تێكچوبوو ب كێر وێ یه‌كێ نه‌هات كو چاندن ل به‌ر بهێته‌كرن، ژبه‌رڤێ ل سالا 2007 حوكمه‌تا هه‌رێمێ بۆریه‌كا هه‌شت ئینجى بۆ گوندى راكێشا و بۆرى ژى د جویێ دا ئینا وبوویه ئه‌گه‌ر كو جویا ئاڤێ بهێته خراپكرن و شكاندن، به‌لێ دووباره بۆریا ئاڤێ ژى ب كێر نه‌هات و دو ساله هه‌موو زه‌ڤیێن گوندێن گوهه‌رزێ و بالاڤا وه‌سا ما بوون”.
زێده‌تر گۆت: (ئه‌ڤ ساله حوكمه‌تا هه‌رێمێ كۆژمه‌كێ پاره‌ى بۆ نووژه‌نكرنا جویا ئاڤێ ته‌رخانكریه و ب ڤێ یه‌كێ پترى 200 جوتیاران دێ مفاداربن و پێدڤیه حوكمه‌ت و لایه‌نێن شوله‌ژێ جویا ئاڤێ ب شێوه‌یه‌كێ باشتر ژ نها درۆست بكه‌ن).
شاكر عومه‌ر، جوتیاره‌كێ ده‌ڤه‌رێ یه بۆ ئه‌ڤرۆ نیوز گۆت: (خوه‌شحالین كو حوكمه‌تا هه‌رێمێ جویا سه‌ر زه‌ڤى و ده‌رامه‌تێ مه نووژه‌نكرى وچێكرنا جویێ دێ بیته ئه‌گه‌ر كو دووباره جوتیارێن مه وه‌كو به‌رێ ده‌ست ب چاندنا برنجى و كونجى و داروبارێ فێقى و ده‌رامه‌تى و هه‌موو جۆرێن دى یێن چاندنێ بكه‌ن).
دياركر: (نێزیكێ 10 هزار دونه‌مێن ئه‌ردێ چاندنێ دێ ب چێكرنا جویا گوندى یا ئاڤێ هێته ئاڤه‌دانكرن ڤه و یا گرنگه حوكمه‌ت سه‌ر ژ نوو جویێ درۆست بكه‌ت ژبه‌ركو نووژه‌نكرن تنێ به‌س نینه).
