پشتی بۆرینا 15 سالان ئاریشا ئەردێ چاندنێ ل ناحیەکێ ھاتە چارەکرن
ئەڤرۆ نیوز، بارزان مزووری:
ئەڤە ژ سالا 2003 وەرەئاریشەکا ئەردێ چاندنێ ل سەر چار ھزار دونەمێن ئەردی ل ناحیا زێلکان یا سەر ب قەزا شێخان ڤە دناڤبەرا مەلاک و جۆتیاران دا ھەبوو، ئەڤە 15 سال بوو ئەڤ ئاریشە مابوو ھەلاویستی و پشتی چەندین بزاڤ ژ لایێ خولێن بۆری یێن پەرلەمانێ کوردستانێ ڤە ژی ھاتینەکرن ھەر ئاریشا ڤی ئەردی چارە نەببوو، لێ پشتی چەندین جاران لقێ 20 یێ پارتی دیموکراتی کوردستان و قایمقامێ قەزا شێخان دگەل ھەر دو لایان کۆمبووین ئەڤ ئاریشە ھاتە چارەکرن.
عاسم محەمەد شەریف، بەرپرسێ نڤیسینگەھا جڤاکی یا سەر ب لقێ 20 یێ شێخان ڤە بۆ ئەڤرۆ نیوز ئاشکرا کر کو ب ھاریکاریا ئیدارا شێخان و لقێ 20 یێ پارتی دیموکراتی کوردستان ل شێخان ئەو شیان ئەڤێ ئاریشێ چارەسەربکەن دگەل 27 جۆتیار و سێ مەلاکا کو ھەر دو لایەن بگەھنە چارەسەریەکێ و زیان ب ھەر دو لایان ژی نەکەڤیت، ژ بەر کو ئەوان مەلاکا سەنەد نەبوون ژ بەر وان ئاریشێن سیاسی یێن دناڤبەرا حوکمەتا بەغدا و حوکمەتا ھەرێما کوردستانێ دا و گۆت: “حوکمەتا بەغدا رێگر بوو ژ دانا سەنەدێن وان یێن ئەردی، بەری سالا 1975 جوتیاران ئەڤ ئەردە چاندن بەلێ حوکمەتا بەعس ئەڤ ئەردێ چاندنێ ڤەگوھاستبوو سەر ناڤێ وەزارەتا باژێرڤانیێَ و ھەتا نھا ژی یێ ل سەر ناڤێ باژێرڤانیێ”.
ناڤھاتی خویا کر کو پشتی سالا 2003 خەلک ڤەگەریایە سەر جھێن خوە ئەڤ ئاریشە سەرھەلدا و مەلاکێن دەڤەرێ داخواز کر کو ئەو ئەرد بۆ وان ڤەگەریت، جوتیاران ژی داخوازا سەنەدێ ژ مەلاکان دکر و گۆت: “ب رێیێن قانوونی ئەڤ ئاریشە مابوو ھەلاویستی و ھەتا نھا سالانە بکوژمێ ملیار دینارا زیان ب ھەر دو لایان دکەفتن ژ بەر کو ئەرد بۆ چاندنێ نەدھاتە بکارئینان”.
