پشتی جەژنێ دێ دەست ب دانانا قەستەرێن ب لەز بۆ نەخۆشان ھێتە کرن
ئه‌ڤرۆ نيوز، رەڤین سالح لاوەند:
ب ئامادەبوونا د. نزار عسمەت رێڤەبەرێ گشتی یێ ساخلەمیا پارێزگەھا دھۆکێ و چەندین نوشدار و کارمەندێن سەنتەرێ نەخۆشیێن دلی، رۆژا جیھانیا نەخۆشێن دلی ھاتە ساخکرن، ھەروەسان ب ڤێ ھەلکەفتی چەندین نوشدار و کارمەندێن سەنتەرێ ئازادی یێ نشتەرگەری و نەخۆشیێن دلی رابوون ب غاردانەکێ ژ بوو پشتەڤانیکرنا نەخۆشێن دلی، د پلانا سەنتەرێ ناڤبری دایە کو پشتی جەژنا قوربانێ دەست ب قەستەرێن ب لەز بکەن بۆ نەخۆشان.
د. نزار عسمەت ب ھەلکەفتا رۆژا جیھانیا نەخۆشیێن دلی دیارکر کو ساخکرنا رۆژێن ھوسا دبیتە ئەگەر تەخەکا زۆرا خەلکی ھایداری ڤان جورە نەخۆشیا بن و گۆت: “ئەڤ نەخۆشیە رۆژ بۆ رۆژ د زێدەبوونێ دایە، ژ ئاکامێن ڤان نەخۆشیان تووشی جەلتا دلی دبن، ژ بەر ھندەک سەربارکێن نەچاڤەرێکری دبیتە ژدەست دانا گیانێ خوە”.
د. فاروق ئیسماعیل رێڤەبەرێ سەنتەرێ ئازادی یێ نشتەرگەری و نەخۆشیێن دلی خویاکر کو پێدڤیە خەلک پتر پێگریێ ب شیرەتێن نوشداران بکەن و گرنگیێ ب وەرزشێ بدەن و گۆت: “سەنتەرێ دلی ل سالا بۆری پتر ژ ٢٢٠ نشتەرگەریێن دلی ئەنجام داینە و ١٨٠٠ قەستەرێن دلی ئەنجام داینە، د ئەڤ سالە دا ١٢٢ نشتەرگەریێن دلی ئەنجام داینە، د گەل پێشکەفتنێ کو نشتەرگەری و قەستەریێن زارۆیان ژی ل ڤی سەنتەری ھاتینە ئەنجام دان، رێژا مرنێ ل ڤی سەنتەری ٢% بوویە، بەراوردی د گەل سەنتەرێن وەلاتێن پێشکەفتی بکەین کو رێژا مرنێ ل نک وان ٢ ھەتا ٣% بوویە”.
زێدەتر گۆت: “د ئەڤ سالە دا پتر ژ ١٣٠٠ قەستەرێن دلی ئەنجام داینە، رێژا مرنێ ١.٥% بوویە، دپلانا مە دایە پشتی جەژنا قوربان دەست ب قەستەرێن ب لەز بکەین، بۆ وان نەخۆشێن تووشی جەلتا دلی دبن یان بەری جەلتێ”.
