پشتی كريارا سکسی کێشە بۆ ژيانا من يا ھەڤژینێ په‌يدا كرن
ئەڤرۆ نیوز:
د راپۆرتەکا رۆژناما ئەڤرۆ دا کو زنار زۆبێر بەرھەڤکریە ژنەک ل دادگەھێ چیرۆکا خوە بۆ دادوەری ل دھۆکێ ب ڤی رەنگی دبێژیت: “پشتی من ب رێیا کەنالێ کوردچات ھەڤالینیا گەنجەکی کری و پەیوەندیێن نەشەرعی ل گەل گرێداین و من وێنەیێن خوە یێن تایبەت بۆ فرێکرین ئەز تووشی چەندین ئارەشەیان بووم و یا ژ ھەمیێ وێرانتر ھەڤژینیا من ب دووماھی ھات، لەورا نەچار بووم ل دادگەھێ سکالایەکێ ل دژی وی گەنجی تۆمار بکەم”، ھەروەکی ژنەکا خودان ھەڤژین چیرۆکا خوە ل دادگەھێ گۆتی”.
د قووناغا ڤەکۆلینێ و دادگەھکرنێ دا ژنەکا تەمەن 23 سالی دیار کر بەری سالەکێ ب رێیا کەنالێ کوردچات ھەڤالینیا گەنجەکی کر و پەیوەندیێن نەشەرعی ل گەل ھەڤدو گرێدان و پشتی بۆرینا ماوەکی وێنەیێن خوە یێن تایبەت بۆ وی گەنجی فرێکرن و پەیوەندیێن وان دبەردەوام بوون و گۆت “پشتی بۆرینا ماوەکی ڤی گەنجی داخواز ژ من کر کو ل گەل وی دەرکەڤم بۆ ئەنجامدانا کارێن خراب، من قەبوول نەکر و ل سەر داخوازیا وی رازی نەبووم و من گوتێ ئەز یا شووکریمە و ئێدی پەیوەندیێ ب من نەکە، لێ وی گەنجی ب رێکا تەلەفونێ گەف ل من کرن کو ھەکە رازی نەبم ل گەل دەرکەڤم دێ وێنەیێن من ل تۆرا جڤاکی یا فێسبوکێ بەلاڤ کەت، لێ ھەر ئەز رازی نەبووم”.
ئەڤێ ژنێ زێدەتر بۆ دادگەھێ دیار کر کو پشتی بۆرینا چەند رۆژان ڤی گەنجی گەفێن خوە کرنە راست و چەند وێنەیێن وێ یێن تایبەت ل ژێر ناڤێ چەند کەسێن وەھمی ل فێسبوکێ بەلاڤکرن و بۆ ئەگەرێ وێ چەندێ کێشەیێن خێزانی بۆ پەیدابن و گۆت “ژێکڤەبوون د ناڤبەرا من و ھەڤژینێ من دا پەیدا بوو، لەورا نەچاربووم ڤێ ئاریشێ ب گەھینمە دادگەھێ و داخوازا سزادانا تۆمەتباری بکەم”.
پشتی دادگەھێ گوھداریا گۆتنێن سکالاکەرێ کری دو دیدەڤانان ژی ئەڤ گۆتنە بۆ دادگەھێ پشتراست کرن کو تۆمەتباری ئەڤ چەندە د دەرھەقێ ڤێ ژنێ دا ئەنجام دایە و وێنەیێن وێ ب چەند ناڤێن وەھمی بەلاڤ کرینە و بەر ب جھەکێ نەدیار خوە بەرزە کریە.
پشتی بۆ دادگەھێ راستیا ڤێ روودانێ ئاشکرا بووی داواکارێ گشتی داخواز ژ دادگەھا کەتنێ کر تۆمەتباری سزا بدەت، لەورا دادگەھێ ژی ل دووماھیێ بریار دا تۆمەتبارێ نەدیار بۆ ماوێ سالەکێ بھێتە زیندانکرن ل دووڤ مادەیێ دو ژ قانوونا ھژمارە شەش یا ب خراب بکارئینانا پەیوەندیێن موبایلێ و ئەنترنێتێ.