پشتی ڤەقەتیانا پێنج سالان باسکت بۆلا ھەرێمێ ڤەگەریا
ئەڤرۆ نیوز، محەمەد عەلی نوری:
پشتی زێدەتری پێنچ سالێن ڤەقەتیانێ ژ چالاکی و خولا، دھێتە چاڤەرێکرن ل حەفتیا بھێت ئێکەتیا باسکت بۆلا ھەرێما کوردستانێ قارەمانیەکێ بناڤێ وەرزشڤانێ دێرین یێ کوردستانێ حاجی سامی دزەیی ل سەر ئاستێ ھەلبژارتیێن پارێزگەھا ل ھەولێرا پایتەخت ئەنجامدەت.
سەردار حەیدەری سەرۆکێ ئێکەتیا باسکت بۆلا ھەرێمێ بۆ ئەڤرۆ نیوز گوت: ب پشکداریا شەش ھەلبژارتیا ئەوژی، دھۆک، ھەولێر، سلێمانی، ھەلەبچە، کەرکووک و مووسل، چاڤەرێیە ھەڤرکیێن قارەمانیا ھەرێما کوردستانێ ل ھولا یانا ئەکاد ھەر ژ 26ھەتا 30ێ ڤێ ھەیڤێ بھێتە ئەنجام دان، ئەوا دێ ب چاڤدێریا رێڤەبەریا گشتی یا وەرزشی ل وەزارەتا رەوشەبنیری و لاوان یا ھەرێما کوردستانێ ڤە ھێتە رێکخستن.
ھەروەسا ناڤھاتی دیارکر کو ھەموو مەزاختیێن قارەمانیێ ژبلی چلۆبەرگێن وەرزشی دێ ل ستۆیێ رێڤەبەریا گشتی یا وەرزشی ڤەبن پێخەمەت پشکداریەکا سەرکەفتی و پشتەڤانی بۆ ھەلبژارتیێن پارێزگەھا کو بشێن بەرھەڤیەکا باش بکەن.
ژلایەکێ دویڤە سەردار حەیدەری ئەوچەندە ژی دیارکر کو پشتی بۆرینا زێدەتری پێنچ سالێن ڤەقەتیانێ ژ چالاکی و خولا ئەڤرۆ ب کەیفخووشیڤە لڤینەک دێ کەڤیتە د وەرزشا باسکت بۆلا ھەرێمێ دا و گەشبینم دێ بیتە دەستپێکەکا باش بۆ وەرزێ بھێت چالاکیێن مە لسەر ئاستێ یانێن ھەرێمێ ڤە ژی بھێنە ئەنجامدان.
