پشتی 25 سالان بۆ ئاشكرا دبیت كو نه كورده
ئه‌ڤرۆ نیوز: ڤه‌ده‌ر ره‌شاڤایی:
هه‌تا ژیێ وی بوویه 25 سال ژی هزر دكر كو ئه‌و كورده و وه‌ك هه‌ر كورده‌كێ دی دژیا ب كلتۆر و ره‌وشه‌نبیریا كوردان ڤه مه‌زن بوو، لێ د ژیێ 25 یێ دا راستی بۆ هاته ئاشكرا كرن و دیار بوو نه كورده.
ئارمه‌ن ده‌میرجیان كو نها ل باژێرێ ئامه‌دێ یێ باكۆرێ كوردستانێ دژیت ژیێ وی 54 ساله، ل سالڤه‌گه‌را كۆمكوژیا ئه‌رمه‌نان چیرۆكا خوه ئاشكرا دكه‌ت و دبێژیت ژیێ وی 25 سال بوون ژ نوو هنده‌ك كه‌سێن دانعه‌مر راستی بۆ ئاشكرا كر كو ئه‌و نه كورده وه‌كی وی هزر دكری، به‌لكو ئه‌رمه‌نه و باپیرێ وی ئه‌رمه‌ن بوو ژ ده‌ستێن كۆمكوژییا توركێن ئوسمانی قورتال ببوو، ده‌مێ هێشتا زارۆك و خێزانه‌كا كورد ئه‌و حه‌واند بوو.
ناڤهاتی به‌حس دكه‌ت كو ئو حه‌یری مابوو پشتی زانینا راستیێ، باپیرێ وی ئه‌رمه‌ن بوو كو ژ ئالیێ ئایینی ڤه كریستیانن، له‌ورا وی ده‌ست پێكر پاشناڤێ خوه بۆ سه‌ر ناڤێ دروست یێ خێزانا خوه گوهری و خوه فێری زمانێ ئه‌رمه‌نی كر ب هیڤیا هندێ بڤه‌گه‌ریته سه‌ر بنیات و ره‌سه‌نه‌تیا خوه.
تێ زانین هنده‌ك چیرۆكێن دی ژی یێن ب ڤی ره‌نگی هه‌نه ژبه‌ركو خێزانێن كوردان ئه‌رمه‌ن پاراست بوون ل شه‌رێ جیهانیێ ئێكێ دده‌مێ توركێن ئوسمانی فه‌رمانا ئه‌رمه‌نان راكری و ملیون و نیڤ كه‌س ژێ كوشتی، بۆ پاراستنا گیانێ خوه گه‌له‌ك ژێ ئێدی خوه وه‌ك كورد ددیت دا ژ سته‌ما توركان پاراستی بمینن، نها هنده‌ك چووینه سه‌ر ئایین و نه‌ته‌وا خوه ڤه و هنده‌ك ژی ب ناسناما خوه ڤه هاتینه گرێدان و دخازن هه‌ر وه‌ك كورد و موسلمان بمینن.
ئه‌رمه‌ن بتایبه‌ت ل توركی دانپێدانێ دكه‌ن كو ژبه‌ر بزاڤێن سیاسی و چه‌كداریێن كوردان نها ئه‌و د وێرن بێ ترس ببێژن كو ئه‌و ئه‌رمه‌نن ژبه‌ركو هه‌تا به‌ریا چه‌ند سالان ژی ل توركیا كه‌س نه د وێرییا زوو ب زوو بێژیت “ئه‌ز ئه‌رمه‌نم”، ته‌په‌سه‌ریا توركان بۆ سه‌ر كوردان پتر ژ ئالیێ نه‌ته‌وه‌یی ڤه بوو لێ لسه‌ر ئه‌رمه‌نان ژ ئالیێ ئایین و نه‌ته‌ویی ڤه‌بوو. هه‌روه‌سا هێشتا توركیا دانپێدانێ ب ڤێ كۆمكوژیێ ناكه‌ت وه‌ك جینۆساید.
