په‌رله‌مانتاره‌ك:کاراکرن و نە کاراکرنا پەرلەمانی یا ل سەر ملێن گۆرانێ مای
ئه‌ڤرۆ نیۆز،زنار تۆڤى:
ئامینا زكرى ئه‌نداما په‌رله‌مانێ كوردستانێ ل سه‌ر لیستا پارتى دیمۆكراتى كوردستان د دیداره‌كێ دا بۆ ئه‌ڤرۆ نیۆز دیاركر:نوكه پارتى دیمۆكراتى كوردستان هیچ مه‌رجه‌ك بۆ كاراكرنا په‌رله‌مانێ كوردستانێ نینه،هه‌روه‌سا پارتى چو هێلێن سور بۆ هیچ كه‌سه‌كێ و لایه‌نه‌كێ ژى ل كوردستانێ نینه،دیسا نوكه ئه‌م د قۆناغه‌كا هه‌ستیار داینه،له‌ورا ژ بۆ ئه‌نجامدانا پرۆسا ریفراندۆما سه‌ربه‌خۆیا كوردستانێ كو ئه‌ڤ چه‌نده د به‌رنامێ پارتى دیمۆكراتى كوردستان دایه و ژبۆ سه‌ر خستنا ڤى پرۆژه‌ى پارتى دیمۆكراتى كورستان یا به‌رهه‌ڤه نه‌رمیێ هه‌مبه‌رى لایه‌نێن دى نیشان بده‌ت،هه‌روه‌سا ئه‌ڤ پرۆسه دێ مینیت هه‌مبه‌رى لایه‌نێ دى،كادێ چه‌ند هێته پێش بۆ كاراكرنا په‌رله‌مانێ كوردستانێ؟.
ناڤهاتیێ دیاركر ژى:د ڤێ حه‌فتیێ دا دانوستاندنێن كاراكرنا په‌رله‌مانێ كوردستانێ دێ ل گه‌ل بزاڤا گۆران هێنه ئه‌نجامدان،له‌ورا دخوازین ئه‌و ژى بێى مه‌رج پشكداریێ د وان دانوستاندنا دا بكه‌ن،چونكى نوكه ب هاتنا یوسف محه‌مه‌دى و ده‌سته‌كا په‌رله‌مانى یا كه‌ڤن په‌رله‌مانێ كوردستانێ كارا نابیت،به‌لكو ب ده‌رخستنا یاسایه‌كێ كو په‌رله‌مان ب رۆلێ خوه یێ یاسایى و ته‌شریعى رابیت،هه‌روه‌سا چاڤدێریا كارێ حوكمه‌تێ بكه‌ت،ل وى ده‌مى په‌رله‌مانێ كوردستانێ دێ كارا بیت،چونكى مه خه‌له‌له‌كا یاسایى هه‌یه،له‌ورا هه‌كه رێككه‌فتن ل سه‌ر ڤى بابه‌تى ل گه‌ل بزاڤا گۆرانێ بهێته كرن و هه‌كه بابه‌تێ پرسا هنارتنا یاسایا بۆ سه‌رۆكاتیا هه‌رێمێ بهێنه هنارتن و گۆران خوه ژ وێ گرێیا نه‌فسى قورتال بكه‌ت،ل وى ده‌مى ب ره‌نگه‌كێ ئوتۆماتیكى دێ په‌رله‌مانێ كوردستانێ كارا بیت.
ئامینا زكرى ئه‌و ئه‌نداما په‌رله‌مانێ كوردستانێ یه زێده‌تر دبێژیت:نوكه كاراكرن و كارانه‌كرنا په‌رله‌مانێ كوردستانێ یا ل سه‌ر ملێن بزاڤا گۆرانێ ماى،چونكى پارتى بۆ وان دیاركریه كو مه هیچ مه‌رجه‌ك نینه،كو جاره‌كادى یوسف محه‌مه‌د وه‌ك سه‌رۆكێ په‌رله‌مانى ب وڤریته ڤه سه‌ر كارێ خوه،یان ژى ده‌سته‌یا به‌رێ یا سه‌رۆكاتیا په‌رله‌مانى ب زڤریته ڤه سه‌ر كارێن خوه،له‌ورا ئه‌ڤ چه‌نده دێ مینیته ل سه‌ر به‌رسڤا بزاڤا گۆران.
هێشتا دبێژیت:ل 20 ئابا 2015 په‌رله‌مانێ كوردستانێ ژ لایێ یاسایى ڤه یێ ژ كار كه‌فتى،چونكى ل وى ده‌مى وان دانپێدان نه‌دكر كو یاسا بۆ سه‌رۆكاتیا هه‌رێمێ بهێنه هنارتن،له‌ورا مه خه‌له‌لا هنارتنا یاسایان هه‌بوو،لێ هه‌كه گۆران خوه ژ ڤێ چه‌ندێ قورتال بكه‌ت و وان چ مه‌رج نه‌بن،دێ جاره‌كادى په‌رله‌مانێ كوردستانێ كارا بیته ڤه،له‌ورا پێدڤیه پارتى و گۆران میكانیزمه‌كا نوو بۆ چاره‌سه‌ركرنا ڤێ پرۆسێ ببینن د كۆبوونێن خوه یێن داهاتى دا.