په‌روه‌ردا ئامێدیێ خوه بۆ سیسته‌مێ ئه‌لكترونیكرنێ به‌رهه‌ڤ دكه‌ت
ئه‌ڤرۆ نیوز ، مه‌حمود نهێلى
رێڤه‌به‌رێ په‌روه‌ردا ئامێدیێ بۆ ئه‌ڤرۆ نیوز دیاركر، كو ئه‌و نوكه یێ خوه به‌رهه‌ڤ دكه‌ن بۆ سیسته‌مێ ئه‌لكترونیكرنا په‌روه‌ردێ و نوكه 80 ماموستا و هاریكار و رێڤه‌به‌ر د خوله‌كا راهێنان دانه.
ناسر موحه‌مه‌د سه‌عید، رێڤه‌به‌رێ په‌ره‌وردا قه‌زا ئامێدیێ بۆ ئه‌ڤرۆ نیوز دیاركر، كو نوكه به‌رنامه هه‌یه هه‌موو سیسته‌مێ كارگێریا په‌ره‌وه‌ردێ ببیته ئه‌له‌كترونى كو دبێژنێ ( E. PERWERDE) و نوكه ئه‌و خوه ڤێ پێنگاڤێ به‌رهه‌ڤ دكه‌ن .
گۆت ژى: ( ب ڤى سیسته‌مى ئه‌لكترونیكرنێ دێ وه‌زاره‌تا په‌روه‌ردێ پێگیرىهه‌بیت ل گه‌ل هه‌موو قوتابخانان و هه‌ر قوتابخانه‌یه‌ك دشێت ب رێكا راسته‌وخو په‌یوه‌ندیێ ب وه‌زاره‌تێ یان رێڤه‌به‌ریا په‌روه‌ردێ بكه‌ت ب رێیا ڤى سیسته‌مى).
دیار كر، هه‌ر قوتابخانه‌یه‌كا ئاریشه‌ك تێدا هه‌بیت، وه‌زاره‌ت دێ یا ئاگه‌هدار بیت چ نه‌بوونا میلاكى بیت یان ژى ڤه‌گوهاستنا ماموستایان بیت یان ژى كاره‌كى دى گرێدایى په‌روه‌ردێ بیت.
دیسا گۆت كو ڤى سیسته‌مى گه‌له‌ك مفایێن خوه یێن هه‌ین چونكه مامه‌له دێ ب له‌زتر و هووربین تر ب رێڤه چن و ئاستێ شاشیان ژى دێ گه‌له‌ك كێمتر بیت و دێ خزمه‌تا قوتابیان و ماموستایان ب ڤى سیسته‌مى پتر هێته كرن. خویا ژى كر، كو نوكه 95 قوتابخانه‌یێن ده‌ڤه‌رێ د پشكدارن دڤى سیسته‌مى دا و ل به‌ره پشتى ب دووماهى هاتنا خولێن فێركرنێ، هه‌موو قوتابخانه‌یێن ده‌ڤه‌رێ ب ڤى سیسته‌مى ڤه بهێنه گرێدان.
