پیرۆزیا ئاڵای تابۆ و هێلا سۆره
ل رۆژا 2014. 12. 17 مه ل هه‌رێما كوردستانێ و هه‌ر جهێ كورد لێ دئاكنجی رۆژا ئاڵایێ كوردستانێ پیرۆز كر، لێ ژبه‌ر سه‌ده‌ما ڤی شه‌رێ داعش و كه‌ڤنه‌په‌رێسیا عه‌ره‌بی و ده‌ڤه‌رێ ب سه‌ر هه‌رێما كوردستانێ دا سه‌پاندی وه‌ك هه‌ژی مه ئه‌ڤ رۆژا هندا پیرۆز ب شاهی و دیلان و ب بزاڤێن كولتۆری و هونه‌ری نه‌خه‌ملاند. خوه‌ش به‌ختانه ب سایا خه‌بات و له‌هه‌نگی یا پێشمه‌رگێن قه‌هره‌مانێن كوردستانێ برینا شنگالێ د جه‌سته‌یا كوردستانێ دا هێلای، ئه‌ڤرۆ ئه‌و برین هاته سارێژ كرن و ئاڵا گه‌شا كوردستانێ ل سه‌رێ چیایێ شنگال و سنونێ و زوممار و ده‌ڤه‌رێن ماین هاته هلدان و گورزه‌كێ ب ژان وه‌شانده نه‌خشێن وان هۆڤا كێشای؛ ب ڤێ هه‌لكه‌فتا پیرۆز ئه‌ز به‌ژنا خوه ل همبه‌ر وان قه‌هره‌مان و بریندار و شه‌هیدان دچه‌مینم. د هاته خاستن من ئه‌ڤ ستوونه ب ڤێ هه‌لكه‌فتا دیرۆكی نڤیسیبایه، لێ چونكو د رۆژا ئاڵایی دا هنده‌ك بێرێزی ل ئاڵایێ مه هاتنه كرن و من ب فه‌ر دیت ئه‌ز وه‌ك تاكه‌كێ كوردستانی ل سه‌ر ب ده‌نگ بهێم و هاوار و به‌نگینا خوه ببه‌مه به‌رده‌ستێ جهێن شوله‌ژێ و بۆ ژ نوهه و وێڤه سنووره‌ك بۆ هه‌ر بێرێزیه‌كا ب ڤی ره‌نگی بهێت دانان و سزایێن توند ژ وان كه‌س و لایه‌نێن پیرۆزیێن مه ئه‌ته‌ك دكه‌ن، ب سه‌ر دا بسه‌پینن دا ببنه په‌ند و كه‌سه‌ك وێ جورعه‌تێ نه‌كه‌ت ده‌ستی بۆ پیرۆزیێن مه ببه‌ت.
وه‌ك دهێت زانین ئاڵا سمبۆل و هێما هه‌ر نه‌ته‌وه‌یه‌كێ یه ب ره‌نگه‌ك وه‌سا كو دیرۆك و كه‌ساتیا نه‌ته‌وه‌یی تێدا به‌رجه‌سته دبت؛ ئاڵایێ مه‌ژی به‌رجه‌سته‌یا دیرۆك و كه‌ساتیا تاكێ كوردستانی دكه‌ت، و هه‌ر بێریزیه‌ك لێ بهێته كرن، بێریزی ل ته‌ڤ تاكێن كوردستانێ دهێته‌كرن، چونكو ئاڵا ل جه‌م هه‌ر نه‌ته‌وه‌یه‌كێ پیرۆز و تابۆ و هێلا سۆره. بۆ پاراستنا ڤی ئاڵای مه هه‌ر تشت گوری كریه دابمینت بلند و پێلدار و دڤێت نه‌هێت ژبیركرن ئه‌ڤ ئاڵایه ئێمانه‌تا یه‌كه‌م سه‌رۆك كۆمارێ كوردستانێ یه قازی محه‌مه‌دێ شه‌هید راده‌ستی بابێ روحی یێ نه‌ته‌وا كورد بارزانیێ نه‌مر كری و ئه‌ڤرۆ ئه‌و ئاڵا ل سه‌ر سه‌كۆیا په‌رله‌مانێ كوردستانێ پێلان دده و قه‌بخازیێ ژ دیرۆك و ئایینده‌یی دخازت. د ڤێ رۆژێ دا و ل ده‌ما هلدانا وی دا ل كه‌ركووكا دل و قودسا كوردستانێ كۆمه‌كا نه‌حه‌ز و كین ل دلێن شۆڤه‌نیستێن عه‌ره‌ب و به‌رماكێن كولتۆرا بیابانێ بێرێزی ل ئاڵایێ مه كرن و هه‌روه‌سا ل دهوكێ ژی ئه‌ڤ بێرزیه هاته كرن هه‌رچه‌نده هه‌ردوو روودان بێ سزا ده‌رباز نه‌بوون. لێ پرسیاره‌كا بنگه‌هین ئازراند كو من چه‌ندین جاران ئه‌ڤ پرسه ئانیه زمان و دانایه به‌رده‌ستێن جهێن شوله‌ژێ ئه‌و ژی: ئه‌ڤ ئاوارێن عه‌ره‌ب یێن ژبه‌ر ره‌وشا سیاسی و شه‌رێ تایفی روو دكه‌نه هه‌رێما كوردستانێ، دهێت خاستن وان د كه‌مپێن تایبه‌ت دا ئاكنجی بكه‌ن و ب چ ره‌نگان و بێی ده‌ستووریا ده‌زگه‌هێن ئاسیش و پارستانێ نه‌هێن ناڤ باژێرێن كوردستانێ، وه‌كو ته‌ڤیا وه‌لاتێن جیهانێ په‌یره‌و دكه‌ن. ژبه‌ر گه‌له‌ك ئه‌گه‌ران یێن ژ گشتان گرنگتر ره‌وشا ئاسیش و ساخله‌میه. ل با هه‌ر كه‌سی خوه‌یایه كو عه‌ره‌بێن سوونه دوژمنێن سه‌ر هشكێن دوزا كوردینه و ده‌ستێ گه‌له‌ك ژ ڤانا د كوشتارگه‌ه و ئه‌نفالان دا هه‌بوون و ئه‌ڤرۆ ژی خوه‌ش هشارن بۆ داعش و گرۆپێن توندره‌وێن ئیسلامی. هه‌ر ئه‌و بوون ژی یێن ل كه‌ركووك و دهوكێ بێرێزی ل ئالایێ مه كرین و به‌ری هینگێ ژی ئاڵایێ ره‌شێ داعشێ ل ئه‌ڤرۆ ستی هلداین، ئانكو ڤان شۆڤینستێن عه‌ره‌ب چ باوه‌ری ب ماف و رێزگرتن ل پیرۆزیێن مه نین. ژبه‌رهندێ ژ جهێن شوله‌ژێ تێته خاستن هه‌ر زوو سنووره‌كی بۆ ڤان بێرێزیا بهێته گرتن و ته‌ڤ ئاواره‌یان د كه‌مپان دا بهێنه ئاكنجی كرن و ب هووری ڤه‌كۆلین ل گه‌ل بهێته كرن و رێزگرتنا پیرۆزیێن مه ل سه‌ر بهێته سه‌پاندن و هه‌رده‌ما سه‌رپێچی كرن، بۆ ده‌رڤه‌ی سنوورێن هه‌رێما كوردستانێ بهێنه ره‌وانه‌كرن.
