پیر دەیان جەعفەر: حوكمەتا ئیراقێ چ هاریكاری بۆ ئاوارەیان نەكرینە
، دلۆڤان ئاكرەیی:
ڕێڤەبەرێ كۆچ و كۆچبەران ل پارێزگەها دهۆكێ دیار كر، د سالا 2026ـدا دێ زێدەتر ژ 500 خێزانێن ئاوارە بۆ گوند و كۆمەلگەهێن خۆ ل سنۆرێ قەزا شنگالێ ڤەگەرن و ئەڤ پڕۆژەیێ ڤەگەریانا ئاوارەیان ب هەڤكاری دگەل ڕێكخراوا نێڤدەولەتی یا كۆچبەران (IOM) و وەزارەتا ناڤخۆ یا حوكمەتا هەرێما كوردستانێ یە كو بەری سێ سالان دەستپێكریە.
پیر دەیان جەعفەر، ڕێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ بۆ ڕۆژنامەیا (ئەڤرۆ) گۆت: پڕۆژەیێ هەڤكاریكرنێ بۆ خێزانێن ئاوارەیێن شنگالێ ل دەستپێكێ ب تنێ ل كەمپێن شێخان و بێرسڤێ بوون، بەلێ پاشان هاتیە بەرفرهكرن بۆ كەمپێن پارێزگەها دهۆكێ و ئیدارا سەربخۆ یا زاخۆ ب گشتی و د ڤێ گەڕا سێیێ دا، دێ 51 خێزان ژ كەمپا قادیێ ڤەگەرنە شنگالێ و ل دووڤ ئاماران ژی، ئەڤ سالە (2026) ب گشتی دێ 595 خێزان بۆ دەڤەر و جهێن خۆ ڤەگەرن.
زێدەتر گۆت: ڕێكخراوا IOM بۆ هەر خێزانەكێ نێزیكی ملیۆن و نیڤ دیناران دابین دكەت، دگەل ڤەگوهاستنا كەل و پەلێن وان ب ڕێكا ترۆمبێلێن ڤێ ڕێكخراوێ، كو پرانیا وان دێ بۆ دۆگورێ، سكێنیێ، گر زەبەرگ و سەنتەرێ تل عزێرێ ڤەگەرن.
پیردەیان خدر گۆت: حوكمەتا ئیراقێ چ هاریكاریەك نەكریە و حوكمەتا ئیراقێ بەری سالا 2024ێ بڕیارەك دابوو كو پێدڤیە هەتا 31ێ تەمموزا 2024ێ چ كەمپ ل هەرێما كوردستانێ و ئیراقێ نەمینن و ئەڤ بڕیارە ب ئاوایەكێ نە سەركەفتی هاتە وەسفكرن، چونكو ل دەستپێكێ تنێ نیڤا كەمپان هاتبۆنە دیاركرن و ل دەما دەستنیشانكری ژی دا (ژ 1ێ كانونا ئێكێ تا 12ێ تەمموزێ) 16,000 خێزانان ناڤێن خۆ تۆماركربۆن، بەلێ تنێ بۆ 3,000 خێزانان ئەو 4 ملیۆنێن هاتبۆنە تەرخانكرن هاتنە مەزێختن، پاشان ژی هاتە گۆتن كو پارە نینە! پێدڤی بوو بەری بڕیار بهێتە دان، بهێتە زانین كا چەند خێزان هەنە و چەند پارە پێدڤیە، نەك د نیڤا ڕێكێ دا بێژن پارە نەما.
ڕێڤەبەرێ كۆچ و كۆچبەران ل دهۆكێ هۆشداری دا و گۆت: ڕەوشا دیموگرافیا شنگالێ د مەترسیێ دایە و پێدڤیە ئێزیدی هەمی ڤەگەرنە سەر جهـ و مالێن خۆ دا كو شنگال بهێز بكەن و د نوكە دا 15 كەمپێن ئاوارەیان یێن خەلكێ شنگالێ هەنە كو نێزیكی 110,000 كەس تێدا دژین و ئەوێن ژ دەرڤەی كەمپان ژی نێزیكی 160,000 تا 170,000 كەس دبن و ب گشتی نێزیكی 270,000 ئاوارە ل هەرێما كوردستانێ (دهۆك، زاخۆ، شێخان، و هتد) ماینە.
