پێدڤیە قانوونا خۆنیشاندانان بھێتە راستڤەکرن
ئه‌ڤرۆ نيوز:
ل گوڕەی قانوونا خونیشاندانان پێدڤی یە خونیشاندان ل دەم و جھەکێ دیار کری ب شێوەیەکێ رێکخستی بیت و نارەزایی ژی ب ئاشتیانە بھێنە دیار کرن و بەروڤاژی ب کارەکێ نەقانوونی دھێتە ھژمارتن و پێدڤی یە پێرابونێن قانوونی ژ سەرپێچیکەران بھێنە وەرگرتن و د قانوونا رێکخستنا خونیشاندانان دا سزایێن سڤک بوو سەرپێچیکەران ھاتینە دیارکرن.
پارێزەر عومەر عەلی دیار کر، ل کوردستانێ قانوونەکا تایبەت ب خونیشاندانا ھەیە ئەو ژی قانوونا ھژمار ١١ یا سالا ٢٠١٠ یە وپشتی ل کوردستانێ خونیشاندان بووینە مودێل و بەر ب زێدەبوونێ ڤە چووین ھزر د دانانا قانوونەکا تایبەت بو رێکخستنا خونیشاندانان ھاتە کرن لژێر ناڤێ قانوونا رێکخستنا خونیشاندانان و ل گورەی ڤێ قانوونێ خونیشاندان کومەلەک یان نیچمە کومەلەکا رێکخستی یە ب شێوەیەکێ ئاشتیانە ل گورپان یان جاددە یان جھەکێ گشتی کو بوو ماوەیەکێ دیارکری بھێتە ئەنجامدان و گۆت : ئارمانج ژی بتنێ درۆستکرنا بووچوونەکا ئێکگرتی یا گشتی یە بوو ب دەستڤە ئینانا مەرەمەکا دیارکری و د بەرامبەر دا پێدڤی یە دەزگەھێن ئەمنی خونیشاندەران بپارێزن و جھێن شولەژێ ژی داخوازیێن وان بەرچاڤ وەربگرن و دگەل رێکخەرێن وان روونن خوارێ و گوھداریا داخوازیێن وان بکەن ئەو ژی ب رێیا لیژنەیەکا تایبەت بوو دیتنا چارەسەریەکا گونجایی د ماوەیەکێ دیارکری دا.
پارێزەری زێدەتر گۆت : ل گورەی قانونێ خونیشاندان مافەکێ دەستووری یە و نابیت بھێتە قەدەغەکرن و د ھەمان دەم دا نابیت رێکخەرێن خونیشاندانان خونیشاندەران پالبدەن دژی گروپەکێ دیارکری ئەڤجا چو ئەو گروپ پارتەک بیت یان ژی و نەتەوە وئاینەک بیت.
پارێزەری ئاشکەرا ژی کر،سەرپێچیکەرێن قانوونا خونیشاندانان سزایێن گرتن و غەرامەیان بوو ھەنە و نابیت ب چو رەنگان چەک و تەقەمەنی و ماددێن سوتەمەنی و ژەھراوی ژلایێ خونیشاندەران ڤە بھێتە ھەلگرتن خوە ئەگەر مولەتا قانوونی یا ھەلگرتنا چەکی ژی ھەبیت یان دەستێ خوە بدانن سەر جورەکێ چەکی ھەروەسا نابیت لدەما خونیشاندانان دا خونیشاندەر ئەو ئارمانجا بوو ھاتیە دەستنیشانکرن ژێ دەرباز ببن و بەروڤاژی پێدڤی یە دەزگەھێن قانوونی و پولیس ب قانوونێ سەرەدەریێ دگەل خونیشاندەران بکەن ئەو ژی دەستەسەرکرن و گرتنا ھەموو وان خونیشاندەرێن کو سەرپێچیێ لسەر قانوونێ دکەن و ئارمانجا خونیشاندانێ دگوھورن و گۆت: سەرجەم وان کەسان ژی بدەن دادگەھێ و دادگەە ژی سزایێن قانوونی کو ئەو ژی گرتن و غەرامەیە ب زیندانکرنا خونیشاندەری کو ژ ھەیڤەکێ زێدەتر نەبیت یان ژی غەرامەکرنە کو ژ ٥٠ ھزار دیناران کێمتر نەبیت و ژ ٥٠٠ ھزار دیناران ژی پتر نەبیت یان ژی ھەردو سزایێن گرتن و غەرامە دێ ژ خویشاندەران ھێنە وەرگرتن ئەگەر ژ ئەنجامێ خونیشاندانێ روودانێن کوشتنێ درۆست ببن ل وی دەمی دادگەە دێ ب سەرەدەریا تاوانا کوشتنێ دگەل خونیشاندەران کەتن.
عومەر عەلی دا زانین ژی،پێدڤی یە قانوونا رێکخستنا خونیشاندانا ل کوردستانێ بھێتە راستڤەکرن و گۆت: سزایێن ئاژاوەگێریێن خونیشاندانان د سڤکن ئەگەر چو قوربانیێن گیان ژ ەستدانێ درۆست نەبن ،دیسا د قانوونێ دا بەحس ل دەزگەھێن ئەمنی و پولیسان ژی ھاتیە کرن و ئەڤە ژی نیشانە کو پێدڤی یە قانوون ب رژدی بچیتە د وارێ بجھکرنێ دا، ژبەرکو جڤاکێ مە جڤاکەک ھشیار و شارەزا نینە د خونیشاندانان دا و گەلەک جاران چێبوویە رێکخەر و خونیشاندەران ئاراستەیێن خونیشاندانان گوھرینە و چەک ھەلگرتینە دووڤدا تاوانێن کوشتن و ئاژاوەگێریێن زور د پشترا دروست بوینە.
