پێرێز یێ پلانەکا جەھنەمی دانیت بۆ ھەلوەشاندنا بریارا ئێکەتیا ئسپانی
ئەڤرۆ نیوز، زنار:
ھوسا دیارە سەروکێ یانا ریال مەدرید فلرونتینو پێرێز یێ خوە بەرھەڤ دکەت بۆ دانانا پلانەکا جەھنەمی و ھەمی شیانێن خوە تەرخانکرینە پێخەمەت ڤەگەراندنا یانا مەلەکی بۆ کاسا شاھێ ئسپانیا پشتی بریارا دوورخستنا وێ ژ لایێ ئێکەتیا تەپا پێ ئسپانیا ڤە ھاتیە دان ژ ئەگەرێ پشکداریا یاریکەرێ سزدای دینێس چێرچێڤ کری د یاریا کاسا دا ھەمبەر یانا قادش.
ل گۆر دووماھی پێشھاتێن ڤێ کەیسی ھوسا دیارە سەروکێ یانا ریال مەدرید فلرونتینو پێرێز پلانەکا موکوم دانایە بۆ ڤەگەراندنا مافێ یانا خوە بۆ ھەڤرکیێن کاسا شاھێ ئسپانیا، ل دووڤ پەیامەکێ رۆژناما مارکا یا ئسپانی دیارکیە کو سەروکێ یانا ریال مەدرید دێ بەر ب دادگەھا کارگێری یا وەرزشی چیت بۆ تێھەلچونا بریارا ئێکەتیا تەپا پێ یا ئسپانی ل دۆر دوورخستنا یانا مەلەکی ژ کاسا شاھێ ئسپانیا.
ئەو بەلگەیێن بەردەستێ سەروکێ یانا ریال مەدرید بۆ ھەلوەشاندنا ڤێ بریارێ ئەوە ل دووڤ مادێ ٤١ ژ رێنمایێن ئێکەتیا ئسپانی کو یانە نە ھاتیە ئاگەھدارکرن ل دۆر سزادانا چێرچێڤ یێ رووسی، دیسان بەری ماوەکی ئەڤ کریارا د خولا ئسپانیا یا کچان دا پەیدابویە ل گەل یانا لورکا کو ڤێ یانێ یاریکەرەکا خوە یا سزادای پشکدارکربوو و ھاتبوو سزدانا لێ دادگەھا کارگێری یا وەرزشی ئەڤ بریارە ھەلوەشاندیە ژ بەرکو ئاگەھداری ل دۆر ڤی سزادی نە گەھشتبوو یانا لورکا لەورا سەروکێ یانا مەدریدی یێ ھەمی بزاڤا دکەت ڤێ بریارێ ب ھەلوەشینت و یانا وی ڤەگەریتە ھەڤرکیێن قارەمانیا کاسێ و گەھشبینیەکا باش بۆ ڤێ چەندێ ل پێش پرێز ھەیە.