پێشبینی دهێتە كرن 14 هزار دۆنەمێن ئەردی ل ئاكرێ بکەنە برنج
رەمەزان زەكەریا
دەڤەرا ئاكرێ د بیاڤێ چاندنا برنجی دا ب هەبوونا ئاخ و ئاڤ و هەوایەكێ گۆنجایی یا ب ناڤ و بانگە كو تێدا شەش جۆرێن برنجی دهێنە چاندن ژ وانە برنجێ شەش مەهی، سەدری، بێندەر، كەسنەدیت، تەحالف و میسری.
یاسین حەكیم، جوتیارەكێ دەڤەرێیە بۆ ئەڤرۆ گۆت: سالێن چوویی مە ل هەیڤا پێنج ل سەرێ هەیڤا پێنج را دەست ب دوورینا كر بۆ برنجی، برنجێ سەدری، ئەوێ بهێندار و دگەل برنجێ شەش مەهی هاتنە چاندن، بەلێ ئەڤ سالە ژ بەر ئەگەرێ بارانبارینێ كو هەتا هەیڤا شەش بارانبارین یا بەردەوام بوو ل بەر وێ ئەگەرێ برنج گەلەك گیرو بوو.
سەنعان عوبەید، جوتیارەكێ دن یێ دەڤەرێیە بۆ ئەڤرۆ گۆت: ئەڤ سالە ل بەر بارانێ چاندنا برنجی گیرو بوو، پار مە هەیڤا چوار تایبەت دووماهیا هەیڤا چار دەست پێ كربوو، بەلێ ئەڤ سالە ئەڤە هەیڤا شەشە مە نوكە دەست پێ كریە، هەموو زڤریتەڤە ل سەر بارانبارینێ، چەند سالە ب گشتی ل دەڤەرێ چاندنا برنجی زێدە بووە ل هەموو جهێن كو ئاڤا پێدڤی هەبیت دهێتە چاندن.
شەمسەدین عەبدوللا، جوتیارێ چاندنا برنجی یە بۆ ئەڤرۆ گۆت: برنجێ ئەڤ سالە دێ زۆرتر چینین، چونكی ئەڤ سالە سالەكا باران بوو پار هشكە سالی بوو، هەر سالا ئاڤا باش بیت برنج زۆر دهێتە چاندن و رەوش و بەرهەمێ برنجی ژی باش دبیت دەڤەرا ئاكرێ ب گشتی بۆ چاندنا برنجی و هەموو بەرهەمێن دی یێن چاندنێ زۆرا گۆنجایە لەورا سالانە چاندن و بەرهەمئینان زێدەدبیت.
ئەڤ سالە دا ل دووڤ پێشبینیێن رێڤەبەریا چاندنا ئاكرێ: ل دەڤەرێ دێ هەتا ١٤ هەزار دۆنەمێن ئەردی ب برنجی هێنە چاندن، ئەڤە د دەمەكێ دا كو پار سال ل دەڤەرا ئاكرێ ٨ هەزار دۆنەم هاتبوونە چاندن و ئەڤ زێدە چاندنا ئەڤ سالە بۆ زێدەبوونا رێژا ئاڤا سەر ئەرد و ژێر ئەرد ڤەدگەرێت.
