پێشنیارێن نوو بۆ ئاریشەیێن كارەبێ هەنە
دووڤچوون، قائید میرۆ
بەرپرسەكێ وەزارەتا كارەبێ ئاشكراكر، پلانا كارەبا پڕۆژێ رۆناكی وەكی خوە دهێتە بڕێڤەبرن و بڕیارە سەرتاسەری هەرێما كوردستانێ ڤەگریت. گوتژی: هەر پڕۆژەیەكێ نوو بیت دێ ئاریشە و ئاستەنگ هەر هەبن، بەلێ پێشنیارێن نوو دێ هەنە و دێ ئەو ئاریشەیێن پەیدا دبن بهێنە چارەسەركرن.
ئەردەلان دۆسكی، رێڤەبەرێ گشتیێ دیوانا وەزارەتا كارەبێ بۆ رۆژناما ئەڤرۆ دیاركر» پڕۆژێ رۆناكی بۆ دابین كرنا كارەبا 24 دەمژمێری وەكی خوە دهێتە بڕێڤەبرن و بریارە بگەهیتە سەرانسەری هەرێما كوردستانێ، چونكە پلان هاتیە دانان و یا دهێتە ئەنجامدان، مە پلان بۆ وەرزێ هاڤینێ ژی هەیە و گورەی پلانێ ئەگەر چو ئاریشەیێن تەكنیكی نەهێنە پێش كارەبا 24 دەمژمێری بدەینە وەلاتیان.
زێدەتر گۆت: هەموو بزاڤێن حوكمەتا هەرێما كوردستانێ بۆ كارەبا بەردەوامن، راستە بەرهەمئینان وەكی خۆیە، بەلێ دێ بزاڤان كەین كارەبا دەمژمێرا د وەرزێ هاڤینێ دا هەبیت، ژبەركو ستراتیژ و پلانا مەسروور بارزانی سەرۆكێ حوكمەتا هەرێما كوردستانێ د كابینا نەهێ دا گەهاندنا كارەبا دەمژمێریە بۆ وەلاتیان، هەتا نوكە زێدەتری 80%ێ هاتیە ئەنجامدان و بەری دەمێ خوەیێ دیاركری دێ هەموو كوردستانێ ڤەگریت، واتە هەموو گوند و باژێڕا دێ كارەبا دەمژمێری هەبیت بێی جوداهی.
ل دۆر ئاریشەیێن هەین مینا ئەو ئاریشەیێن دهۆكێ پەیدابووی ئەردەلان دۆسكی گۆت» راستە ئاریشە هەنە ل هەموو دنیایێ ژی دەمێ پڕۆژەیەكێ نوو كەڤیتە كاری یێ بێ ئاریشە نینە، تیما پڕۆژێ رۆناكی و كەسێن بسپۆر و شارەزا بەردەوام یێ كار دكەن بۆ چارەسەركرنا ئاریشەیان و پێشنیارێن نووژی هەنە بۆ چارەسەركرنا وان، پڕۆژێ رۆناكی پڕۆژەیەكێ ستراتیژیە و چەندین ئالیانڤە مفا بۆ وەلاتیان و هەرێما كوردستانێ هەیە، بەلێ چونكە هێشتا قۆناغا دەستپێكێ یە دێ ئاریشە هەر هەبن، بەلێ ئەگەر ب تەمانی بكەڤیتە كاری بێگومان وی دەمی دێ وەلاتی هەست ب مفایێن ئەڤی پڕۆژەی بكەن، چونكە خەونا چەندین سالا یا وەلاتیێن هەرێما كوردستانێ یە ببنە خوەدیێ كارەبا 24 دەمژمێری.
