پێنچ یانێن ئورۆپی ھەڤرکیێ ل سەر دەستڤە ئینانا یاریزانەکێ موریتانی دکەن
ئەڤرۆ نیوز:
بەرەڤانێ ھەلبژارتیێ موریتانیا و یانا دفاع ئەلجدید یا مەغرەبی بوویە جھێ گرنگیا چەندین یانێن ئورۆپی پشتی شیای ئاستەکێ بلند د قارەمانیا کاسا نەتەوەیێن ئەفریقیا پێشکێش بکەت ئەوا نوکە ھەڤرکیێن وێ ل وەلاتێ مسر دھێنەکرن.
رۆژناما لکیپ یا فرەنسی ئاشکراکریە پێنچ یانێن ئورۆپی حەزا ئیمزاکرنا ھەڤبەستا بەرەڤانێ ٢٠ سالی یێ ھەلبژارتیێ موریتانیا بکاری ندیای، پشتی وی یاریزانێ ناڤبری شیای ئاستەکێ بلند ل گەل ھەلبژارتیێ وەلاتێ خوە د قارەمانیا ئەفریقیا دا پێشکێش بکەت.
ئەوێ رۆژنامێ ناڤێ ئەوان ھەر پێنچ یانان ئاشکراکریە ئەوێن ھەڤرکیێ ل سەر دەستڤە ئینانا ئەوی بەرەڤانێ موریتانی دکەن ئەوژی ھەر ئێک ژ یانێن ستراسبورگ و مونبێلە یێن فرەنسی و فرایبورگ یا ئەلمانی و ڤیاریال یا ئیسپانی و کلوپ بروج یا بەلجیکی.
ھەژی گوتنێ یە بکاری ندیای ل ھاڤینا ٢٠١٧ ژ یانا زینە یا موریتانی ھاتبوو ڤەگوھاستن بۆ یانا دفاع ئەلجدید یا مەغرەبی و ھەڤبەستا ئەوی دێ ل ھاڤینا ٢٠٢٠ ب دووماھیی ھێت و یانا ئەوی دخوازیت بەری ھەڤبەستا ئەوی ب دووماھیی بھێت بفروشتە ئێک ژ ئەوان یانێن ئورۆپی ئەوێن ھەڤرکیێ ل سەر دەستڤە ئینانا ئەوی دکەن.