پەرلەمانتارێن کورد ئیمزا ل سەر پێشنیارا گوھۆرینا سرودا عیراقێ کریە
ئەڤرۆ نیوز، عەلی حاجی :
دداخویانیەکێ دا ئەندامەکا پەرلەمانێ عێراقێ بۆ ئەڤرۆ نیوز دیار کر دو پەرلەمانتارێن ھەڤپەیمانیا سائیرون پێشنیار کری یە سرودا نیشتیمانیا عێراقێ بناڤێ مەوتنی بھێتە گوھۆرین ل جھێ وێ ئێکا دی بھێتە دانان.
وەسفیا شێخو زێدەتر گۆت: ھەردو پەرلەمانتارێن ھەڤپەیمانیا سائیرون ل گورەی ماددەیا ٦٠ یا دەستورێ عێراقێ و ماددەیا ١٢٠ یا سیستەمێ ناڤخویی، پێشنیارەک پێشکێشی لژنا رەوشەنبیری و راگەھاندنێ کو سرودا نوکە یا عێراقێ بھێتە گوھۆرین و ل جھێ ئێکا دی بھێتە دانان و نوکە ئەو پەرلەمانتار مژوولی کومکرنا ئیمزانە بۆ وێ پێشنیارێ و ھەر پێشنیارەکا زێدەتری ٥٠ ئیمزایێن پەرلەمانتارا ل سەر نەبیت دێ ھێتە لادان.
ناڤھاتی زێدەتر گۆت: نوکە دا ژمارەیەکا پەرلەمانتارێن کورد ئیمزا ل سەر وێ پێشنیارێ کرینە لێ ب مەرج ، مەرجێ پەرلەمانتارێن کورد ژی ئەوە کو سرودا نوو دەربرینێ ژ ھەمی پێکھاتەێن عێراقێ بکەت و نابیت دناڤ وێ سرودێ دا چو پێکھاتەیەک بھێتە پشت گوە خستن ژبەر کو ھەر پێکھاتەیەک بھێتە پشت گوە خستن ئەو سرود دێ ھێتە لادان.
