پەرلەمانتارەکێ ئێکەتیێ: پاشەکەفتا مووچەی نامینیت
ئەڤرۆ نیۆز،زنار تۆڤی:
پەرلەمانتارەکێ ئێکەتیا نیشتمانی یا کوردستانی راگەهاندیە ،کو پاشەکەفتا مووچەی نامینیت.
عزەت سابر ئەو پەرلەمانتارێ کوردستانێ یە د راگەهاندنەکێ دا بۆ ئەڤرۆ نیۆز دیارکریە،کو ل رۆژا 1/1/2018 حوکمەتا هەرێما کوردستانێ دێ سیستەمەکێ نوو بۆ پێدانا مووچەی پەیرەوکەت.
عزەت سابر هەروەسا دبێژیت:پشتی ڤێ بەروارێ،دێ مووچێ بنەرەتی و دەرمالێن خـێزانێ و زارۆیان و پیشەیی، مەترسی، بروانامێ، ئەندازیاری و نۆشداری ب سەر فەرمانبەرێن کوردستانێدا هێتە دابەشکرن.
ب ئەگەرێ قەیرانا دارایی حوکمەتا هەرێما کوردستانێ ل رۆژا 1/1/2016 ب ناڤێ سیستەمێ پاشەکەفتا مووچەی،پشکەک ژ مووچێ فەرمانبەر و مووچەخۆران ل دەف خوە هەلگرتیە.
قەیرانا دارایی ل هەرێما کوردستانێ، ب ئەگەرێ برینا بەشە بوودجێ کوردستانێ ب بریارا نوری مالکی ل سالا 2013 و شەرێ ل دژی تیرۆریستێن داعش،هەروەسا نزمبوونا نرخێ نەفتێ ل جیهانێ و هاتنا زێدەتر ژ دو ملیۆن ئاوارێن عێراقێ دروستبوویە.
