پەرلەمانێ عیراقێ دێ ڤی کاری بۆ شنگالێ کەت
ئەڤرۆ نیوز، لەزگین جوقی:
سەرۆکێ جڤاتا قەزا شنگالێ دیار کر کو پەرلەمانێ عیراقی پشتەڤانیا ئیدارا شنگالێ کریە بۆ تۆمارکرنا سکالایەکی و دێ روونشتنەکا تایبەت ل سەر رەوشا شنگالێ ئەنجام دەت.
وەیس نایف، سەرۆکێ جڤاتا قەزا شنگالێ بۆ ئەڤرۆ نیوز دیار کر کو پەرلەمانێ عیراقی ئەو ئاگەهدارکرینە کو دێ روونشتەکا تایبەت ل سەر رەوشا شنگالێ ل پەرلەمانێ عیراقێ ھێتە ئەنجامدان ب مەرەما دیتنا رێ یێن چارەسەریێ بۆ رەوشا نوکە ل شنگالێ ھەی و گۆ: “ئەم چاڤەرینە بریار ژ پەرلەمانێ دەربکەڤن بۆ شنگالێ و ئەو بریار بجنە د وارێ بجە ئینانێ دا بۆ ئاسایکرنا رەوشا شنگالێ و ئاڤەدانیێ و ڤەگەریانا ئاواران بۆ سەر جە و مالێن وان و زڤرینا ئیدارا شەرعی یا شنگال بۆ خزمەتکرنا وەلاتیان ل دەڤەرا شنگالێ”.
ناڤھاتی دیار کر کو پشتی شاندەکێ ئیدارا شنگالێ دگەل سەرۆکێ پەرلەمانێ عیراقی و ھەر دو جێگرێن وی کۆمبووی بابەتێ تۆمارکرنا سکالایەکی ژی ھاتە گەنگەشەکرن وسەرۆکێ پەرلەمانی عیراقی ئەو پشتراستکرن کو سکالایێ تۆماربکەین و وێ سکالایێ بدەنە پەرلەمانێ عیراقێ ژی دا باشتر کار ل سەر بھێتە کرن.
سەرۆکێ جڤاتا قەزا شنگالێ خویا کر کو ئیدارا شەرعی یا شنگالێ ھەموو بزاڤان دکەت بۆ ئاسایکرنا رەوشا شنگالێ و ئاڤەدانیا شنگالێ و دەرخستنا گرۆپێن نەقانوونی ژ دەڤەرێ و گۆت: ” نوکە ئەم د گەشبینین دێ کارەکێ باش بۆ شنگالێ ھێتە کرن و پێدڤیە حوکمەتا عیراقێ ژی پتر پشتەڤانیا ئیدارا شەرعی یا شنگالێ بکەت”.
