پەیڤدارێ حوكمەتا فیدرالی: كۆمكرنا چەكی د دەستێ دەولەتێ دا د چارچۆڤەیێ سەروەرییا ئیراقێ دایە
د دەمەكێ دا كو بانگەشەیا وێ چەندێ دهێتە كرن كو عەلی زەیدی، سەرۆك وەزیرێن ئیراقێ ب مەرەما دانوستاندنێ ل دۆر چەكدانانا میلیشیایان دێ چێتە تەهرانێ، پەیڤدارێ فەرمیێ حوكمەتا زەیدی ب شێوەیەكێ نەراستەوخۆ ئەو دەنگۆباس رەت كرن.
حەیدەر عەبوودی، پەیڤدارێ ب ناڤێ حوكمەتا فیدرالی راگەهاند كو عەلی زەیدی، سەرۆك وەزیرێن ئیراقێ دێ سەرەدانا هەر ئێك ژ ئێرانێ و توركیایێ كەت، ئەڤە ژی د چارچۆڤەیێ بجهئینانا بەرنامەیێ كارێ حوكمەتا وی دایە كو ئاماژێ ب بهێزكرنا پەیوەندیێن ئیراقێ ل گەل وەلاتێن جیران و هەڤپشكێن هەرێمی و نێڤدەولەتی دكەت.
ئەو چەندە ژی دیار كر كو سەرەدان د چارچۆڤەیێ پێدڤیێن جیرانەتیێ و بەرژەوەندیێن هەڤپشك دانە و تێدا هەژمارەكا دۆسییێن دوولایەنی ل گەل دۆسییێن هەرێمی د بن رۆناهییا وان پێشهاتان دا یێن كو دەڤەرێ ب خۆ ڤە دیتین، ل گەل بزاڤان بۆ كێمكرنا بارگرژیێ و زێدەكرنا ئاسایش و ئارامیێ، دێ هێنە گەنگەشەكرن.
د پشكەكا دی یا ئاخڤتنێن خۆ دا، پەیڤدارێ حوكمەتا فیدرالی ب شێوەیەكێ نەراستەوخۆ بەرسڤا وان دەنگۆیان دا كو باس ل وێ چەندێ دكەن، سەرەدانا عەلی زەیدی بۆ ئێرانێ، پەیوەندی ب بابەتێ چەكدانانا میلیشیایان ڤە هەیە و گۆت»دۆسێیا كۆمكرنا چەكی د دەستێ دەولەتێ دا، كارەكە د چارچۆڤەیێ سەروەرییا ئیراقێ دایە و ل دووڤ حوكمێن دەستووری و یاسایی و ب بڕیارەكا نیشتمانیسا سەربەخۆ دهێتە بڕێڤەبرن».
