چارەسەریێن دلی چاوا دهێنە ب کارئینان؟
د.مەجید حسین دۆسکی، تایبەتمەندێ نەخۆشێن دل و هەناڤا و قەستەرا دلی، ئاماژە ب هەبوونا سروشتێ نەخۆشیێن دلی کر و دیار کر کۆ ئاریشێن دلی ب گشتی نەخۆشیێن دۆمدرێژن؛ ئەڤە پێدڤی ب چارهسەریەکا بەردەوام دکەت داکۆ نەخۆشی ب شێوەیەکێ دروست بهێتە کۆنترۆلکرن، نەک کۆ ب ئێکجاری نەهێلیت. ژ بەر هندێ، پێگیرییا نەخۆشی ب ڕێنماییێن نۆشداری بنەمایێ سەرەکی یێ چارهسەریێ یە و نەخۆش ب بڕیارا خۆ ب هیچ ڕەنگەکێ بۆ نینە دەرمانێن خۆ ب راوەستینیت یان گۆڕانکاریێ د ژمارە و دوزا وان دا بکەت، ئیللا ب ڕەزامەندی و بڕیارا ڕاستەوخۆ یا نۆشدارێ تایبەتمەند ب خۆ بیت.
دەربارەی پرسیارا هندەک نەخۆشان کۆ دەمێ هەست ب باشبوونێ دکەن یانژی د دەمەکێ دیارکری دا دەرمانی ژ بیر دکەن، دکتور مەجید بەحس ل هندێ کر کۆ پتریا دەرمانێن سەردەم یێن دلی کاریگەرییا وان بۆ دەمێ بیست و چار سعەتانە، ئانکو شەڤ و ڕۆژەکێ، ڤەدکێشیت. ژ بەر هندێ، درەنگکەفتن یان پێشکەفتنا دەمێ خوارنا حەپکەکێ ب دەمێ سعەتەۆێ یان دو سعەتان دا دێ کارتێکرنەکا مەزن دروست کەت. بەلێ پاشگوهخستنا ب تەمامی یان نەخوارنا دەرمانی دێ ب شێوەیەکێ نەرێنی کارتێکرنێ کەت، ب تایبەت ئەو دەرمانێن بۆ رێکخستنا لێدانێن دلی دهێنە بکارئینان کۆ پێدڤی ب ڕێکخستن و پێگیرییا تمام هەنە.
ل سەر بابەتێ پەیوەندیدار ب خوارنێ و دەرمانێن گیای (سروشتی)، تایبەتمەندێ نەخۆشێن دلی دیار کر کۆ بکارئینانا زەرزەوات و فێقی د خوارنێ دا گەلەک بۆ ساخلەمیا دلی باشە، بەلێ دەرمانێن گیایی ب هیچ شێوەیەک نابیت ببنە جهگر ب دەرمانێن پزیشکی. ئاریشا دەرمانێن سروشتی یان کوردی د هەمی مللەتان دا هەیە، و ئەگەر نەخۆش ب ڤی جۆری قەناعەت هەبیت، دروستە ل پال دەرمانێن خۆ بکار بینیت ب مەرجەکی کو شوونا حەپکێن نۆشداری نەگریت و ژ خوارنا عیلاجێ خۆ یێ سەرەکی سست نەبیت.
د.مەجید دۆسکی بەرسڤا وێ پرسیارێ دا کا ئەرێ دەرمانێن دۆمدرێژ یێن دلی کاریگەرییا خراپ ل سەر ئەندامێن دی یێن لەشی وەک گولچیسک یان مێلاکێ دکەن؟ وی ئەڤ یەکە ب تەمامی ڕەت کر و ڕوونکر کۆ ئەڤ دەرمانە ب هیچ شێوەیەکی زیانێ ناگەهیننە ئەندامێن دی؛ بەروڤاژی، پتریا وان وەکو پاراستن بۆ گولچیسک و میلاکێ و بۆریێن خوینێ کار دکەن و کارتێکرنا وان ئەرێنی یە.
هەروەسا بۆ دابەشکرنا چەند دەرمانان د ڕۆژێ دا، ئامۆژگاری کر کۆ دەرمانێن جۆراوجۆر ب سەر سپێدێ، نێڤڕۆ و شەڤێ دا بێنە بەلاڤکرن، ب تایبەت دەرمانێن میزکەر دڤێت سپێدێ بێنە خوارن دا کۆ کارتێکرنێ ل خەوا نەخۆشی نەکەن.
د دووماهیا دیدارێ دا، ل سەر ڕۆلێ خێزانێ، نۆشدارێ تایبەتمەند دیار کر کۆ ئێک ژ بنەمایێن گرنگ ئەوە کۆ ئەندامەکێ خێزانێ بڕێڤەبرنا دەرمانێن نەخۆشێ تەمەنمەزن بگریتە دەست، دا کۆ تووشی خەلەتی یان ژبیرکرنێ نەبیت. هەروەسا پێدڤی یە خێزان خوارنا خۆ ب گشتی ب ئاوایەکێ کێم-خوێ و کێم-دۆهن بەرهەڤ بکەن داکو نەخۆش هەست ب جوداهی و پەراوێزخستنێ نەکەت. ژ لایەکێ دی ڤە، پشتەڤانیا دەروونی ڕەگەزەکێ سەرەکی یە؛ ڤێجا دڤێت مالبات ڕەوشا نەخۆشی ئاسایی ببینن و مورالا وی بەرز ڕابگرن دا کۆ ب ئارامی وەک کەسەکێ کارا د جڤاکی دا بەردەوامیێ بدەتە ژیانا خۆ.
