چاڤدێرەكێ سیاسی: ئەمریكا دێ بڕیارێ ل دۆر پشتەڤانیكرنا عەلی زەیدی دەت
هەولێر، قائید میرۆ
چاڤدێرەكێ سیاسی ئاشكراكر، سەرەدانا چاڤەڕێكری یا سەرۆك وەزیرێن ئیراقێ بۆ ئەمریكا یا چارەنڤیسسازە و دێ ئەمریكا دو رۆژا پشتی كۆمبوونا ل گەل سەرۆك وەزیرێن ئیراقێ بڕیارێ ل دۆر پشتەڤانیكرنا عەلی زەیدی دەت. ئاماژە كر ژی: نەخشەیێ نوو یێ رۆژهەلاتا ناڤین ل رۆژا 17 ڤێ مەهێ دێ هێتە دیاركرن و پێنج وەلات دێ پشكداریێ تێدا كەن.
د. سامان شالی، چاڤدێرێ سیاسی بۆ رۆژنامەیا ئەڤرۆ گۆت» ئەمریكا پشتەڤانییا عەلی زەیدی كریە ببیتە سەرۆك وەزیرێن ئیراقێ و ژئالیێ سەرۆكێ ئەمریكا هاتیە ڤەخواندن بۆ ئەمریكا، دەستپێكرنا شەڕی دژی كەسێن گەندەل پێنگاڤەكا گەلەك گرنگە ژئالیێ سەرۆك وەزیرێن ئیراقێ ڤە، چونكە ب دیتنا من ئەڤێ بڕیارا زەیدی ل دەرڤە دێ بهایی خۆ هەبیت، ئەمریكا دو تشتان ژ عەلی زەیدی دخوازیت، یا ئێكێ بشێت گرۆپێن میلیشیایان ژچەك بكەت و چو هێزەك ل دەرڤەی قانوونێ نەمینیت، پێنگاڤا دویێ ژی بەرهنگاری گەندەلكاران ببیت و شەڕێ گەندەلیێ بكەت، نوكە شەڕێ كەسێن گەندەلی كری دەستپێكریە، بەلێ پێدڤییە ژ نەهەنگێن مەزن دەست پێبكەت نەك ماسیێن بچووك بگریت و یێن مەزن قورتال ببن، گەلەك ناڤ د لیستا وان كەساندا هەنە یێن دەست هەبووی د گەندەلیێ دا، بەلێ دڤێت پێنگاڤێن دی ژی بهاڤێژیت هەتا خەلك پشتەڤانییا سەرۆك وەزیرێن ئیراقێ بكەت، خەلكێ ئیراقێ ب هەموو پێكهاتە و ئالیێن سیاسی ڤە پشتەڤانییا ئەڤێ پێنگاڤا عەلی زەیدی دكەن، مخابن گەندەلی بوویە پەنجەشیر و كەفتییە دناڤا جەستەیێ حوكمەتا ئیراقێ دا و رۆژ بۆ رۆژێ لاواز دكەت و خرابتر دكەت، هیڤی دكەین پرۆسەیا بەرهنگاربوونا گەندەلیێ یا دوم درێژبیت و ب شەڤ و رۆژەكێ ناهێتەكرن، هەروەسا كەسێن بەلگە ل سەر هەنە و دەست هەبوویە د گەندەلیێ دا بهێنە سزادان و دەربازنەبن ژ دەست قانوونێ».
د. سامان شالی ئاماژەكر» ل رۆژا 15 ی ڤێ مەهێ سەرۆك وەزیرێن ئیراقێ دێ گەهیتە ئەمریكا و ئیدارەیا ئەمریكا دێ بۆچوونا خۆ ل دۆر رەوشا ئیراقێ بۆ وی زەلال كەت، كا چ ژ زەیدی دڤێت، راستە وەكی نوكە ئەمریكا پشتەڤانییا وی دكەت، بەلێ دەمێ چوو ئەمریكا دڤێت هەموو تشتەكی ب زەلالی بۆ وان ئاشكرا بكەت، دو رۆژا پشتی كۆمبوونا ل گەل سەرۆك وەزیرێن ئیراقێ دێ كۆمبوونەكا دی هێتەكرن كو ئیمارات و سعودیە و بەحرێن دێ پشكداریێ تێدا كەن و نەخشەیێ نوو یێ رۆژهەلاتا ناڤین دێ هێتە دانان، د كۆمبوونا 17 ڤێ مەهێ دا دێ دیاربیت كا ئەمریكا دێ بێژیت پشتەڤانییا ئیراقێ بكەن یان ژی نەكەن، هەكە بزانیت د شیانێن عەلی زەیدی دا نینە بۆ ئەنجامدانا ئەركێ پێهاتیە سپاردن یان ژی بن هەژموونا وەلاتێن دی یە ئەڤە باوەرناكەم پشتەڤانییا ئیراقێ بهێتەكرن، بێگومان گەلەك مژار دێ كۆمبوونا رۆژا 17 ڤێ مەهێ هێنە باسكرن ژوان ژی شەڕێ ئەمریكا و ئیسرائیلێ ل گەل ئیرانێ و هەلوەستێ ئیراقێ ل دۆر ئەڤی شەڕی و قۆناغێن پشتی شەڕی، ئینانا تەرمێ خامنەیی بۆ ئیراقێ ژی دێ كاریگەری ل سەر سیاسەتا ئەمریكا هەمبەر ئیراقێ هەبیت.
