چاڤێن خوماری یێن باژێڕی
ژینێ رێکانی
عەسمان خوە ب ستێران دخەملینیت
شەڤ ل بەر سەمایا بێدەنگییا ستێران
پێژنێن خوە ل سەرێ رێكێن
رێڤنگێن عەشقا پیرۆز
بەلاڤە دكەت
شتلێن سپێدا دچینیت…
شەڤ پێژنێن خوە دادعویریت
خوە لبەر پێژنا لێدانێن دلێ من
ناگریت…
د نابەینا تارییاتییا شەڤێ و
سەمایا بێدەنگییا ستێرا و
پێژنا لێدانێن دلێ من
ڕەوانێ من
بۆ عەشقا تە
كرنۆشەكا (حەلاجانە)
خەملاندی ب گولێن سۆر
ب ساپیتكێن ژۆرا من ڤە
سەرنشیڤ دادلەقینیت…
ژۆرا منا ژ لویلاقێن سەرما تنێبوونێ گرتی
دلی لێ دسۆمیت
ئەڤە رۆژا ئەڤ دلە ئاشنای عەشقا تە بووی
ئەز هەر دبێژم
تو ل زڤستانا ڤێ ژینا من
بوویی قاپویتەكێ زڤستانێ
ڕەوانێ منێ سڕێ بری
گەرم دكەی و ب مەیا ژینێ
ڤەدژینی ب نوی ڤیانێ
ئۆخ … خوەزی تە زانیبا
تو چ پەیڤەك شرینی ل سەر زمانێ من
چ شەكرۆكا رۆژێن جەژنا نەورۆزێی
ل سەر زارێ من…
تو كیڤە چووی
كێ ئاورێن تە یێن هنگڤینی
د عەورێن بهاری پێچان و
بۆ وارەكێ دویر دەراز رەڤاندی
لێدانێن دلی ژ گۆتگۆتكان دحال دچیت
تەكەزی رێك و پەیا رێكا دبیت
ل بازارێ باژێڕێ من
دچاڤێن خوماری یێن باژێری دا
هەمی سپێدەهیان
ل تە دگەڕیت.
