چو گرفت د بەرهەمئینانا كارەبێ دا نەماینە
دلۆڤان ئاكرەیی
رێڤەبەرێ گشتیێ وەزارەتا كارەبێ ل حوكمەتا هەرێما كوردستانێ دیاركر، نوكە چو ئاریشە د بەرهەمئینانا كارەبێ دا نەماینە و 85%ێ یا هەرێما كوردستانێ كارەبا 24 دەمژمێری هەیە، و هەتا دوو مەهێن دی ل هەمی هەرێما كوردستانێ كارەب دێ بیتە 24 دەمژمێری.ئەردەلان دۆسكی، رێڤەبەرێ گشتیێ وەزارەتا كارەبێ ل حوكمەتا هەرێما كوردستانێ بۆ رۆژنامەیا ئەڤرۆ گۆت: د دەما دروستبوونا ئاریشەیێن تەكنیكی، وەزیرێ كارەبێ چاڤدێریا كێشەیان دكەت و پرانیا جاران ل گەل مە سەرەدانا مەیدانی دكەت و راستەوخۆ دووڤچوونا كێشەیان دكەت و ل ماوەیێ چووی هند كێشەیێن تەكنیكی د ڤەگوهاستنا كارەبێ دا دروست ببون و هەڤدەم غازا كۆرمۆر ژی كێم ببوو، بەلێ سۆپاس بۆ خۆدێ ئەو ژی هاتە چارەسەركرن، لەوما نوكە چو گرفت نەماینە و رەوشا كارەبێ ئاسایی بوویەڤە.
ئەردەلان دۆسكی زێدەتر گۆت: نوكە ل هەرێما كوردستانێ ٨٥٪ پڕۆژەیێ رۆناهی هاتیە جێبەجێكرن و كارەبا 24 دەمژمێری هەیە، بتنێ 15% مایە. بڕیارە هەتا دوو مەهێن دی ل سەرانسەری هەرێما كوردستانێ كارەبا ببیتە 24 دەمژمێری و تێتە پێشبینیكرن كو كار بەری دەمێ دیاركری ب دووماهی بهێت، چونكی بڕیار بوو بەری دووماهیا ئەڤ سالە ب دووماهی بهێت، بەلێ كار ب لەزتر برێڤە چوون و د نوكەدا بتنێ چەند دەڤەرەكێن كێم ماینە، ئەو ژی د ماوێ ڤان دوو مەهان دا دێ ب دووماهی هێن و كارەبا ٢٤ دەمژمێری دێ هەمی هەرێما كوردستانێ هەبیت.
