چۆمسکی: ئێدی ل رۆژھەلاتا ناڤین چو تشتەک وەک بەرێ نامینیت
نۆم چۆمسکی زانایێ ناڤدارێ ئەمریکا د دیدارەکێ ل گەل رۆژناما واشنتۆن پۆست دیار دکەت کو ھێرشا ڤێجارێ یا ئەمریکا ل سەر داعش مرۆڤ دشێت وەک دەستپێ کرنا شەرێ جیھانی یێ سێیەم ل قەلەم بدەت و ھەروەسا ڤێجارێ ئەمریکا ل گەل پتر ژ ٤٠ وەلاتێن جیھانێ شەرێ تیرۆرێ دکەت و رەنگە ئەو شەرە تنێ ل ھەمبەر داعش نەبیت و پشتی داعش ئەو شەرە ل گەل قاعیدە و بۆکو حەرام ژی بھێتە کرن، چونکو مەترسیا گرۆپێن توندرەوێن ئیسلامی رۆژ ب رۆژێ زێدەتر دبیت و ژ بەر وێ یەکێ ژی پشتی ژناڤچوونا داعش و قاعیدە ل رۆژھەلاتا ناڤین دێ گەلەک وەلاتێن نوو ھێنە ئاڤاکرن و ھەروەسا سیستەمێن سیاسی یێن گەلەک وەلاتێن عەرەبی ژی دێ ھێتە گوھۆرین و ئەمریکا ژی ژ بەر وێ یەکێ نھا دخوازیت داعشێ ژناڤ ببەت.
زانایێ ناڤدارێ ئەمریکا د بەردەوامیا ئاخڤتنا خوە دا وێ یەکێ ژی دیار دکەت کو داعش نھا ئاستەنگیەکا مەزن ل ھەمبەر ستراتیژیا ئەمریکا ل دەڤەرێ دروست کریە و ژ بەر وێ یەکێ ژی ئەمریکا ل گەل وەلاتێن ھەڤپەیمانێ خوە بزاڤێ دکەت کو بەریا ھەر تشتەکێ وان تیرۆرستان ژناڤ ببەت، چونکو شەرێ کو داعش ل ھەمبەر کوردان و وەلاتێن دی دکەت وەسا کریە کو بارێ ئابووری یێ دەڤەرا رۆژھەلاتا ناڤین گەلەک خراب ببیت و وێ یەکێ ژی زیانێن مەزن گەھاندیە ئەمریکا و ژ بەر وێ یەکێ ژی ئۆباما ب ھەموو رەنگەکی بزاڤا ژناڤبرنا داعش و گرۆپێن دی یێن تیرۆرستی دکەت.
د پشکەکا دی یا ئاخڤتنێن خوە دا چۆمسکی رەخنەیێن توند ل ئۆبامای دگریت و دیار دکەت کو دەمێ بن لادن ھاتیە کوشتن ئۆبامای وەسا ھزر دکر کو ئێدی گرۆپێن توندرەوێن ئیسلامی نەشێن ل ھەمبەر ئەمریکا و جیھانێ چو ئالۆزیان دروست بکەن و ژ بەر وێ یەکێ ژی وان ب چاڤەکێ گەلەک بچووک بەرێ خوە دا داعشێ و دەمێ وێ رێکخراوێ شیا پشکەکا مەزن ژ ئاخا سووریێ و عیراقێ داگیر بکەت پێدڤێ بوو ئەمریکا وێ دەمێ ھێرشی وان کربا لێ ئەو یەک نەھاتە کرن و داعش ژی رۆژ ب رۆژێ خوە ب ھێز کر و مەترسیا وێ ژی نھا ل سەر ھەموو جیھانێ ھەیە.
چۆمسکی ئاماژە ب وێ یەکێ ژی دکەت کو ئەمریکا باش دزانیت ژ بەر گەلەک ناکۆکیێن ناڤخوەیی و ئەو نەخشێ سیاسی یێ دەڤەرا رۆژھەلاتا ناڤین ئەو قەیرانە روو دایە و پشتی ژناڤچوونا داعش دێ ڤالاھیێن مەزن دروست ببن و گەلەک وەلات و دەڤەرێن نوو دێ ھێنە ئاڤاکرن، چونکو زۆرداریا ل عیراق و سووریێ ل سوننان دھێتە کرن یەک ژ ئەگەرێن سەرەکی بوویە کو داعشێ شیایە وێ خالێ باش بۆ خوە بکار بینیت و پێگەھێ خوە ب ھێز بکەت و نھا داعش د پراکتیکێ دا زۆرداریا ھەرا مەزن ل سوننان دکەت و ل گەلەک پارێزگەھێن سووریێ و عیراقێ ژی دیار دبیت کا چاوا وان دڤێت ل گۆر ھزرا ھزار سالێن بۆری جڤاکێ برێڤە ببەن و خەلک ژی وێ یەکێ قەبوول ناکەن، ژ بەر وێ یەکێ دڤێت ئەمریکا خەلەتیا سالا ٢٠٠٣ ل عیراقێ دوبارە نەکەت و پشتی ژناڤچوونا داعشێ ھاریکاریا ئاڤاکرنا سیستەمەکی دیموکراتی ل رۆژھەلاتا ناڤین بکەت.
به‌رهه‌ڤكرن، هۆشه‌نگ تاجر:
