ڕوحـا تـاخی
موسا خالد
ل تاخەکێ کەڤن ل ناڤەندا باژێڕی، مام ئەحمەد هەمی ڕۆژان ل سەر کورسیكەكا داری بەرامبەر دەرگەهێ مالا خۆ دڕوونشت. مام ئەحمەد زەلامەکێ مەزن بوو، ڕەوشتێ وێ گەلەک سادە بوو، و هەمی تاخی ڕێز لێ دەگرت. د ڤان سالێن دووماهییێ دا، تاخ هاتبوو گوهۆڕین؛ ئاڤاهییێن بلند و مەزن ل جهێ مالێن کەڤن دروست ببوون و کەیف و خۆشیا جاران یا د ناڤبەرا جیرانان دا کێم ببوو، و هەر ئێك مژوولی کارێن خۆ ببوون. ئێدی وەك بەرێ پرسیارا هەڤدو نەدكرن.
ڕۆژەکێ، کوڕکەکێ گەنج ب ناڤێ ڕێبین، کو ژنوی هاتبوو د وی تاخی دا ئاکنجی ببوو، د بەر مام ئەحمەدی ڕا دەرباز بوو. ڕێبین گەلەک یێ ب لەز بوو…، رێبینی مام ئەحمەد دیت و سلاڤ لێ کر و وی ژی بەرسڤ دا:
– «ب خێر بهێی کوڕێ من، ڕۆژباشتر…».
ڕێبین ڕاوەستیا، سەحکرە مام ئەحمەدی چەوان ب گەرمی سلاڤا وی ڤەگێڕا. د ناڤ چاڤێن مام ئەحمەدی دا دلسۆزییەکا وەسا هەبوو کو ڕێبین نەچار کر پێنگاڤێن خۆ خاڤ بکەت وپتر نێزیكی وی بیت؛ کەنیا سادە ل سەروسیماێن مام ئەحمەدی دیار دکر کو ل پشت ڤی تەمنێ سەرێ سپی، دیرۆکەکا پڕ ژ خەمخۆری و ڕوحا جڤاکی یا هەلگرتی. ڕێبین ل تەنشتا مام ئەحمەدی ڕوونشت و دەست ب ئاخفتنێ کر. مام ئەحمەدی بۆ ئاخفت کا چاوان بەرێ جیرانان د نان و ئاڤێ دا هەڤپشک بوون، چاوان دەمێ کەسەک نەخۆش ببا هەمی تاخ لێ کۆم دبوون، و چاوان دەرگەهێن مالان هەمی دەمان ڤەکری بوون.
ڕێبینی هەست کر کو سەرەڕای پێشڤەچوونا ئاڤاهییێن نوی، ئێک ژ تشتێن هەرە گرنگ کو جڤاک ل سەر دهێتە ئاڤاکرن – ئەو ژی پەیوەندیا مرۆڤایەتی و خەمخۆریا ئێکودوە – بەرەڤ کێمبوونێ دچیت. ژ وی ڕۆژێ وەرە، ڕێبینی بڕیار دا کو ڕەوشا تاخی بگوهۆڕیت. وی دەست ب سەرەدانا جیرانان کر و پێشنیار کر کو دەم ب دەم کۆم ببن دا پرسیارا مەزنێن تاخی بکەن و هاریکاریا ئێکودو بکەن.
سادەییا ئاخفتنا مام ئەحمەدی بوو ئەگەر کو گەنجێن تاخی دوبارە ڕوحا هەڤپشکیێ و جڤاکی ڤەگەڕیننەڤە ناڤ دلێن خۆ. بۆ هەمیا دیار بوو كو جڤاک نە ب تنێ ئاڤاهی و جادەنە، بەلکو ب ڕەوشت، سلاڤ، و خەمخۆرییا مرۆڤان بۆ ئێکودو و حەژێكرنە.
