ڕۆژانە 1500 تەنێن بەرهەمێ ناڤخۆ یێن كوردستانێ بۆ ئیراقێ دهێنە رەوانەكرن
رەمەزان زەكەریا
وەزارەتا چاندنێ و ژێدەرێن ئاڤێ ل حكومەتا هەرێما كوردستانێ داخازەكێ ژ جوتیاران دكەت و ڕادگەهینیت هەر جوتیارەكێ ڕێگری ل هەناردەكرنا بەرهەمێ وان بهێتەكرن ئاگەهداریا وان بكەن و چ ئاریشەیەك ل ڤرێكرنا بەرهەمێ چاندنێ نینە.
قارەمان قادر، پەیڤدارێ وەزارەتا چاندنێ و ژێدەرێن ل حكومەتا هەرێما كوردستانێ راگەهاند: ڕۆژانە هزار و 200 بۆ هزار و 500 تەنێن بەرهەمێ چاندنێ یێ جوتیارێن هەرێما كوردستانێ ب ڕێكا بازگەهێن مووسل بۆ ناڤەڕاست و باشوورێ ئیراقێ دهێنە فرێكرن.
گۆتژی: ڕێككەفتن و لێكتێگەهشتن دگەل بەغدا هەیە بۆ فرێكرنا بەرهەمان ل گۆر وێ ڕۆژ ژمێرا بۆ بەرهەمێ چاندنێ هاتیا دانان، ئەڤا هەی ڕێگریكرنە ل بەرهەمێ دەرەكی نەكو ناڤخۆیی، چ بەرهەمەك ل چارچۆڤێ ڕێككەفتنا هاتیە كرن ل بازگەهێن ئیراقێ ژی ناهێنە ناڤ هەرێما كوردستانێ، ل سەر ئەڤێ پرسێ ڕێككەفتنا تەمام هەیە.
خویاكر: هەر جوتیارەكێ ڕێگری لێ بێتەكرن ڕاستەوخۆ وەزارەتا چاندنێ ئاگەهدار بكەن، ب ئەڤی مەرجی جوتیار پابەندێ ڕێنماییان بیت ژ وان ژی كلیشا ئێكگرتی یا هەرێما كوردستانێ و ئیراقێ ل سەر ئالوگۆڕا بەرهەمان كو دبیت مۆر و ئیمزا و ئیمەیلا حكومەتا هەرێما كوردستانێ ل سەر بیت، ب ڤی نڤێساری مامەلە دگەل حكومەتا ئیراقێ دهێتەكرن و داخاز ژی دكەین كو هەر جوتیارەك ب ئەڤان ڕێنماییان ڕێگری لێ بێتەكرن ڕاستەوخۆ نوێنەرێ وەزارەتێ دێ پەیوەندیێ ب بەغدا ڤە كەت.