ڕێكا بێ ڤەگەڕ
وەعد عەبدولرحمان
ژ چیایێن بلند
ژ بنار و زنارێن شرین
هشت هزار گیان
وەك فریشتەیا فڕین…
د كەڤنە بەرپەڕێن دیرۆكەكێ دا
بێدەنگیێ شەرم ژ خۆ كر
ئاسۆ ژی بۆ وان گرین…
نە بتنێ
ڕێڤینگێن شەڤێ بوون
خودانێن ڕۆژێ بوون
ب جانێن خۆ بەری دەستان
دارێن ژیانێ دچاندن..
لێ ناڤێن وان
د لاپەڕێن ڕەش دا
هاتنە خواندن..
ل وێرێ…
د بیابانا خودان سروشتێ هۆڤ دا
نێرگز و كانی
چیا و چنار
د هەناسەیین خۆدا ڤەشارتبوون
سەردەمەك بوو…
مرۆڤاتی مابوو بێ خودان
بتنێ هێلان
بۆ گورگێن هار و بێ وژدان..
دایكێن چاڤەڕێ
خەما دلێ وان سۆتن
ل بەر دەرازینكێن هیڤییا
ڕۆژێن خۆ كرن گۆری
شەڤ ب ڕۆندك و گری…
ئەڤرۆ ئەو
سەربلندییا چیانە
شانازییا هەمیانە
ژیان دزێت…
ژ ئەڤینا د ناڤ بیرهاتنێن وان دا
د ئەسمانێ وەلاتی دا
ئەو بوونە ستێر…
د چاڤێن جیهانێ دا
بوونە هێما
ئازا و دلێر.
