ڕێوڕەسمێن بیرئینانـا 38 سالییا ئـەنفالا بەهدینان هاتنە گێـڕان
ڕێوڕەسمێن 38 سالییا ئەنفالێن بەهدینان دوهی 26/8/2026 ژ لایێ ڕێڤەبەرییا گشتی یا كاروبارێن شەهید و ئەنفالكریان ب هەڤكاری ل گەل سەنتەرێ ڤەكۆلینێن جینۆسایدێ یێ زانكۆیا دهۆك ب بەرهەڤبوونا سەربەست لەزگین، بەرپرسێ مەكتەبا ڕێكخستنا پارتی دیموكراتی كوردستان ل بەهدینان و ب چاڤدێرێ و ئامادەبوونا د. عەلی تەتەر، پارێزگارێ دهوكێ و هاریكارێن بەرپرسێ مەكتەبا رێكخستنێ و هەژمارەكا بەرپرسێن لقێن پارتی ل سنۆرێ پارێزگەها دهۆكێ و د. نافسەر نوری، بریكارێ وەزارەتا شەهید و ئەنفالكریان و كەسوكارێن شەهید و ئەنفالكرییان و خەلكێ دەڤەرێ هاتنە گڕێران، د رێوڕەسمان دا پشكینێن DNAیێن حەفت روفاتێن گوندێ مێرگەتویێ رادەستی كەسوكارێن وان هاتنە كرن.
پارێزگارێ دهۆكێ د پەیڤەكێ دا بەحس ل قووناغێن ئێك ل دووڤ ئێك یێن ئەنفالێن ل دژی هەرێما كوردستانێ ب گشتی و ئەنفالا دەڤەرا بەهدینان كر و دیاركر كو ئەنفال بەڕنامەیەكێ داڕێشتی یێ حكومەتا ئیراقێ یا وی دەمی و ڕژێما بەعس بوویە و گۆت: «ب هەموو شیانان كار لسەر قركرن و نەهێلان و بێدەنگكرنا گەلێ كوردستانێ كر، د قووناغێن دەستپێكێ دا ب سەدان گوند ب ئێكجاری ژناڤبرن و ب هزاران خەلكێ دەڤەرێ ب هەموو پێكهاتە و تەخ و چینێن چڤاكی ڤە ب ئێكجاری دەربەدەركرن و كۆمكوژ و ئەشكەنجەدان، ب مخابنیڤە هەتا ڤی دەمی حكومەتا ئیراقێ چو پێنگاڤەك بۆ قەرەبووكرنا كەسوكارێن شەهیدان نەهاڤێتیە».
پاش د پەنەلەكێ تایبەت دا سەربەست لەزگین، بەرپرسێ مەكتەبا ڕێكخستنا پارتی دیموكراتی كوردستان ل بەهدینان بەحس ل زۆرداری و كارێن نەمرۆڤانە یێن ڕژێما بەعس دژی خەلكێ دەڤەرێ و ئەو ئێش و ئازار و نەهامەتی و نەخۆشیێن ب سەر مللەتێ كورد دا هاتین و خۆڕاگری و قوربانیدانا گەلێ كورد ب گشتی كر، د دووڤ دا چەند كورتە ڤیدیویێن دیكیۆمێنتاری ل دۆر زۆلم و ستەما دژی خەلكێ دەڤەرێ ب گشتی هاتنە نیشادان و پرتووكەكا تایبەت ب ئەنفالان ڤە هاتە بەلاڤكرن و چەند نۆشدارێن ل وی دەمی خزمەتێن ساخلەمیێ پێشكێشی برینداران كرین هاتنە خەلاتكرن.
