ژبلی شۆك و تۆڕان ماسیگر كارەب و تەقەمەنی و ژەهرێ بۆ ماسیگرتنێ بكاردئینن
هەرهین محەمەد:
پاراستنا ژینگەهێ و سامانێن ئاڤی ئەركەكێ نیشتمانی و شارستانی یە كو راستەوخۆ كارتێكرنێ ل سەر داهاتوویێ جڤاكی و ئاسایشا خۆراكێ چێدكەت. ل هەرێما كوردستانێ، ڕێبارێن وەك خابوور و خازر نەك ب تنێ ژێدەرێن سەرەكی یێن ئاڤێ نە، بەلكو بنەمایێ زنجیرەكا دەولەمەند یا ژیانا سرۆشتینە.
عەبدولستار عبدولحەمید سپینداری وەكو ژینگەهـ پارێزەك بۆ ئەڤرۆ گۆت: قەدەغەكرنا ماسیگرتنێ، كو بەهراپتر ل هەیڤا سێ (ئادارێ) دەست پێدكەت و هەتا هەیڤا شەش یان حەفتێ یا بەردەوام بیت، گۆڕانكاریێن مەزن ل سەر ژیانا ئاڤی چێدكەت. ل ڤی دەمی، ماسی دچنە قۆناغا زاووزێ دا و ڕاگرتنا ماسیگرتنێ دەلیڤەیێ ددەتە ماسیان دا كو بنەماڵێن خۆ نوو بكەن و ڕێژەیا وان زێدە ببت و ئەگەر ئەركێ پاراستنا ئاڤێ نەبیت، سامانێ ماسیان ل ڕێبارێن مە یێن وەكی خابوور و خازری دێ ل بەر مەترسی و نەمانێ شێت.
ناڤبری گۆت: هندەك كەس هەنە ب تنێ بۆ دەمبۆراندن و خۆشیێ دچنە سەر ڕێباران و د دەمێ قەدەغەیێ دا ژی دیارە زانیاریێن تەمام نینن و شووكێ دهاڤێژن. بۆ ڤان كەسان، مە شیرەت دان و سۆزنامە چێدكرن دا كو دووبارە نەكەن. بەلێ گەڕا مەزنا مەترسیێ ئەو كەسن ئەڤێن ب مەبەستا بازرگانیێ و ل بێ ژیانیێ ئامرازێن كارهێنەر وەكی كارەبێ، تەقەمەنی و بومبان، یان دەرمانێن ژەهراوی بكار دئینن و بكارئینانا كارەب و بومبان بتنێ ماسیا مەزن ناكۆژیت، بەلكو تەڤایا زیندەوەرێن د ئاڤێدا وەكی ماسیێن بچووك، كیسەڵان، و روبیانان ژناڤ دبەت و دێ هێلێ ل سەر زنجیرا خۆراك ل ناڤ ئاڤێ چێدكەت. ژەهراوی بوونا ئاڤێ كێشەیەكا دویرو درێژتر چێدكەت؛ ئاڤا ژەهراوی دچێتە ناڤ ڕەز و باغێن جوتیاران، د ئەنجامدا بەرهەمێ چاندنێ ژی مەترسیێ بۆ سەر تەندرۆستیا وەلاتیان چێدكەت. لەورا بكارئینانا تەقەمەنیان ل هەموو وەرزێن ساڵێ تاوانەكا مەزنا ژینگەیی یە.
