ژبه‌ر داخویانییا ره‌مادی مه‌زنترین جه‌نه‌رالێ ئه‌مریكی داخازا لێبۆرینێ ژ دایكه‌كێ دكه‌ت
ئه‌ڤرۆ نیۆز: ڤه‌ده‌ر ره‌شاڤایی:
ئێك ژ مه‌زنترین پله‌دارێ سه‌ربازیێ ئه‌مریكی جه‌نه‌رال مارتن دێمپسی سه‌رۆك ئه‌ركانێ هێزێن ئه‌مریكی بفه‌رمی داخازا لێبۆرینێ ژ دایكه‌كێ دكه‌ت، ژ ئه‌گه‌رێ داوی ئاخڤتنا وی لسه‌ر باژێرێ ره‌مادی یێ ئیراقی كری.
دایكا سه‌ربازه‌كێ ئه‌مریكی كو كورێ وێ ل سالا 2006 ێ ل باژێرێ ره‌مادی ل ئیراقێ هاتبوو كوشتن ،گازنده ژ جه‌نه‌رال دێمپسی كرن ژبه‌ركو ناڤهاتی به‌ری چه‌ند رۆژان گۆتبوو گرتنا ره‌مادی ژ ئالیێ داعش ڤه نه هندا گرنگه وه‌ك گرتنا پارزنینگه‌ها بێجی و چ سیمبۆلا خوه نینه.
ڤێ دایكا ئه‌مریكی دیاركر كو ده‌مێ وێ ئه‌ڤ گۆتنه بهیستی گه‌له‌ك كره گری ژبه‌ركو كورێ وێ ئێكه‌م سه‌ربازێ هێزا ده‌ریاییا ئه‌مریكی بوو ل ئیراقێ هاتیه كوشتن، وێ هه‌ست پێكر چ گرنكی بقوربانییا كورێ وێ ناهێته دان.
ئێكسه‌ر پشتی گازندا وێ به‌لاڤ بووی جه‌نه‌رالێ ئه‌مریكی به‌لاڤكرنه‌ك ئاراسته‌ی وێ كر و گۆت: ژ دل داخازا لێبۆرینێ دكه‌م هه‌كه‌ر ب ئاخڤتنا من خه‌ما ته مه‌زنتر لێهات بیت.”
