ژمێریارییا ژینگەهـێ و تێچۆیێن پیسبوونێ
سڤین سەدیق حەسەن
د جیهانا ئێرۆ دا؛ بابەتێ پاراستنا ژینگەهێ بوویە ئێک ژ گرنگترین بابەتان. گەلەک کۆمپانیا و دامەزراوە ب چالاکییێن خۆ کاریگەریێ ل سەر ژینگەهێ دکەن، وەکی پیسبوونا هەوای، ئاڤێ و ئاخێ. ژ بەر ڤێ چەندێ پێدڤی ب بابەتێ ئابووری و ژمێریاری یێ ژینگەهێ هاتیە هەست پێ کرن داکو هەمی تێچوون و زیانێن ژینگەهێ ب شێوەیەکێ دروست بهێنە تۆمارکرن و هەژمارتن.
هەكە پێناسەیا ژمێریاریا ژینگەهێ بهێتە كرن دێ بیتە ئەو پرۆسە کو هەمی زانیاری، تێچوون و کاریگەرییێن چالاکییێن ئابووری ل سەر ژینگەیێ تێدا دهێنە تۆمارکرن و راپۆرتکرن. هەر دیسا ئارمانجا سەرەکی ژێ ئەوە کو سازیێن فەرمی و نە فەرمی و دامەزراوە بەرپرسیار بن ژ پاراستنا ژینگەهێ و کێمکرنا زەرەرێن وێ.
ئەڤجا گرنگیا ژمێریاریا ژینگەهێ د چەند خالان دا دیار دكەم ئەو ژی
١- هاریکاریا کۆمپانیا دکەت كو تێچوونێن د ژینگەهێ دا دهێتە كرن بهێنە دیاركرن.
٢- رێڤەبەر دکارن بڕیارێن باشتر و دروستتر بدەن.
٣- پاراستنا سەرچاڤەیێن سروشتی و بەردەوام پشتەڤانیێ لێ دکەت.
٤- باوەریا کڕیاران، وەبەرهێنەران و جڤاكێ زێددە دکەت.
٥- هاریکاریا دامەزراوەیان دکەت كو یاسا و ڕێسایێن ژینگەهێ بهێنە بجهئینان.
هەر دیسا دەربارەی پۆلینكرنا جۆرێن تێچوونێن ژینگەهێ ب ڤی رەنگی دیار دبن:
١- تێچوونێن پێشگیریێ: ئەو تێچوونن بۆ ڕێگرتن ل پیسبوونا ژینگەیێ دهێنە مەزاختن.
٢- تێچوونێن چاڤدێریێ: بۆ پشکنین و چاڤدێریا هەوای، ئاڤ و ژینگەهێ.
٣- تێچوونێن چاکسازیێ: بۆ پاککرن و چاککرنا جهێن زەرەرێن ژینگەهێ لێكەفتین.
٤- تێچوونێن خەسارەتیێ: ئەو تێچوونن کو ژ ئەنجامێ زەرەرێن ژینگەهێ پەیدابووین.
هەلبەت ژ بلی ئەڤێ چەندێ مفایێن ژمێریارییا ژینگەهێ دكارین د کێمکرنا زەرەرێن ژینگەهێ دا خۆیا بكەین و باشکرنا رەنگ و ناڤودەنگیا کۆمپانیان هەروەسا زێدەکرنا کاڕامەییێ د کارئینانا سەرچاڤەیان دا، دیسا ژی پاراستنا ساخلەمیا مرۆڤی و ژینگەهێ.
د دەرئەنجامە دا دکارین بێژین کو ژمێریاریا ژینگەهێ رۆلەکێ گرنگ و کاریگەر د پاراستنا ژینگەهێ دا هەیە. ئەڤ جۆرێ ژمێریاریا هاریکاریا کۆمپانیا و دامەزراوەیان دکەت دا کو بەرپرسیارانە کار بکەن، زەرەرێن ژینگەهێ کێم بکەن و سەرچاڤەیێن سروشتی بۆ نفشێن داهاتی بپارێزن.
ژێدەرێن سەرەکی:
1- وانەیێن مامۆستایان.
٢- پرتووكا محاسەبەیا ژینگەهێ.
٣- سەرچاڤە و گۆڤارێن زانستی یێن تایبەت ب ژینگەهێ و محاسەبە ڤە.
٤- چەند مالپەڕێن ئەلیکترۆنی یێن ئەکادیمی و زانستی.
*مامۆستا زانکویا دهۆک
کۆلیژا کارگیری وئابووری
