ژڤان و شێوازێ خولا فوتسالا کچان ھاتە دیارکرن
ئه‌ڤرۆ:
ب ئامادەبونا نوونەرێن یانێن پشکدار د خولا ھەرێما کوردستانێ یا فوتسالا کچان دا ل بارەگایێ خوە ئێکەتیا تەپا پێ یا کوردستانێ کومبونەک ئەنجامدا و ژڤانێ ھەڤرکیێن خولێ دەستنیشان کرن.
دڤێ کومبونێ دا سەلام حسێن سکرتێرێ ئێکەتیا تەپا پێ کوردستانێ دیارکر پشتی وان کومبون ل گەل یانێن پشکدار د خولا فوتسالا کچان دا ئەنجامدای، گەھشتنە رێککەفتنێ ل سەر شێواز و ژڤانێ دەستپێکرنا ھەڤرکیێن خولێ و بریار ھاتە دان ھەڤرکیێن خولێ ل ھەیڤا تەباخا ئەڤ سالە دەستپێبکەت ب پشکداریا دەە یانا ل سەر ئاستێ ھەرێما کوردستانێ و ئەڤ یانە دێ ھێنە پارڤەکرن ل سەر دو کومان ھەر کومەک ژ پێنج تیمان پێک دھێت.
ناڤبری ئەو چەندە ژی دیارکر ل دووڤ داخوازا یانێن پشکدار ئەڤ شێوازە ھاتە دانان ژبەرکو قەیرانا دارایی یا یانێن ھەرێما کوردستانێ و مەزاختیێن وان کێم بن، لێ ھەردەمێ بارێ دارایی یێ ھەرێما کوردستانێ باشبوو بودجەیا ئێکەتیا تەپا پێ ھاتە ھنارتن ژ لایێ لایەنێن بەرپرس دێ شێوازێ دو کومان ھەلوەشینن و ب شێوازێ خول یاریان ئەنجامدەن.
